Dugnadsånd i Vikebygd.
Opning av ny leikeplass mellom Lio 1 og 2.
(18.12.2011 SteinarS)  Klokka 15:00 på søndag 18. desember vart den nye leikeplassen i Vikebygd offisielt opna med program for borna og grilling for heile familien.

Dugnadsarbeidet har ført til ein flott uteplass for bygda, som kan nyttast både sommar og vinter.  

Lekeplassen er både ein naturtomt der terrenget har fått liggja slik det var, men også tilrettelagt med ein hellelagt område i eine hjørna.  Her er det sett opp lèvegg og ei grillgryte er på plass.  På opningsdagen sørgja Geir Rasmussen for bål i grillen og steikte pølser til dei frammøtte.  Foreldra hadde også sørgja for ei gyte med kakao.  Til å tale på opninga hadde komitèen invitert varaordførar Steinar Skartland. 

Dugnad er kjenneteiknet på Vikebygd. Ved å gjennomføra noko i fellesskap oppnår ein glede både under arbeidet, men også i form av å kjenna ein eigarskap til det ein har vore med på å byggja.  Då er det grunn til å tru at leikeplassen både blir brukt og teken godt vare på.

- Vi skal byggja eit halvtak over helleplassen, fortel Geir Rasmussen.  - Sjølv om borna ikkje har vondt av å vera ute i dårleg vêr, så er det jo kjekt at foreldra kan vera med og samla seg under tak.

Tomter for nye familiar like ved leikeplassen.
Like ved leikeplassen er det lagt ut eit nytt bustadfelt med 19 tomter som nå vert klargjorde.  - Det har alt vore fire interesserte og vurdert å byggja her, men det er ikkje teikna kjøpsavtale med nokon av dei, fortel dagleg leiarr i Tomteselskapet, Leon Dyngeland. Han har stor tru på at det vert bygging av hus her om ikkje så lenge.

Litt uti programmet dukka sjølvaste julenissen opp med sekk på ryggen.  Dette sette borna pris på.  Dei strøymde saman rundt nissen som hadde ein sekk full av godteposar.  Men det var nokre som undra seg over at nissen hadde dongri bukse på. Dei hadde greie på kva nissen var.
Les meir om opningsarrangementet her.

Eldsjeler tok initiativ
Både Lio 1 og Lio 2 hadde tomter som skulle vera til leikeplass. Nå er begge desse gjort om til bustadtomter og nytt areal til felles leikeplass vart sett av mellom felta. 

- Me fekk avtale med kommunen om å laga sykkel og gangsti mellom felta.  I staden for at kommunen kjøper dyrt fekk velforeininga midlar til materialar og har nå sett i gong med å laga utstyr til leikeplassen sjølv, fortalde Geir Rasmussen i vår då dugnaden tok til.

- Me fekk 10.000 av Vikebuen, 16000 av VAF og 3000 av SR-Bank. Utover det flotte arbeidet Agnar Alne har gjort av entreprenør-arbeid, så er alt anna gjort på dugnad.  - Vi har nok fagfolk til at dette er gjort fagleg rett. Nå blir her ein leikeplass for heile bygda der turstien går rett forbi.     Les meir her.