(2.11.2011 SteinarS)  Det har utvikla seg eit godt samarbeid mellom idrettslaga i Vikebygd, Skjold og Vats.  Kommunen har definert tre oppvekstsenter i kommunen, som kvart har tre bygder tilknytt seg.  Ungdomane i Vikebygd, Skjold og Vats er på same ungdomsskule i Skjold.  Her er bygd stor idrettshall og ungdomane har funne saman innan m.a. fotball i laget Skjoldar.  I haust nådde jentelaget Skjoldar J16 til topps og vart krinsmeistrar.  Men aktiviteten dreier seg ikkje berre om Skjold.  Når dei nå skal laga fotballfest, så vert denne lagd til Vikebygd, kor også laget har henta fleire lovande spelarar.

-Skjoldar IL skal arrangera fotballfest for laga i alderen 13-16 år i bygdahuset i Vik fredag 4. november kl 2000-2400, fortel Bergfrid Kolltveit.  -Det blir matservering og underhaldning/dans og musikk ut i dei små timar.  

Alle fotballspelarane, oppmenn og trenarar har fått skriv om festen som har påmelding. (Fristen var 28. okt.). Komiteen ser fram til ein underhaldande og trivelig kveld saman med fotballspelarane på Skjoldar IL!

Fleire ungdomar frå Vikebygd spelar på laget Skjoldar, som gjorde det svært godt med ein sølvplass i Norway Cup i juli (G 16). 

Også J 16 jentelaget har gjort det svært godt, og fekk av Haugar omtalen: "Dei gjekk på ei salig blanding av flybensin og silosaft."

Ein av dei aktive spelarane er Ingveig Skartland Svendsbøe, som vart heidra av idrettslaget med innsatspokalen, overrekt på 17.-mai feiringa i bygda.

Fotball - Skjoldar IL
Målfest for meisterjentene - krets meister 2011
(27.10.2011)  Laurdag hang IL Skjoldar sitt jentelag med nebbet etter eit kjipt tap. Tysdag scora dei heile ni mål i den avgjerande kampen om meistertittel, skriv Skjoldar på web sida si.

Sjå bilete på IL Skjoldar si web-side

Skjoldar J16 møtte Madla i den avgjerande kampen om tittelen som kretsmeister og kampen var på heimebane i Skjold tysdag 25. oktober.  Etter mindre enn ti minutt klarer Eline Ohm å komme seg gjennom Madla-muren og sender ballen i mål. Berre åtte minutt seinare gjentek ho handlinga, til stormande jubel frå både lagvenninner, trenerar og publikum.  Første omgang enda 2-0.  Eit kvarter ut i andre omgang kom scoringane som perler på ei snor for skjoldarjentene. Kaptein Ingveig Svendsbøe spanderte to nettkjenningar på berre fem minutt, den andre scoringa brukte ho hovudet på. Tre minutt seinare sikra Oda Wannberg den femte scoringa, og berre nokre minutt etterpå knalla Stina Nordtveit nok ein ball i mål. Sunniva Frøyland heldt fram med ny scoring og ti minutt etter kunne heile Skjold juble med Kristin Hjorteland. Like før dommaren bles av kampen avslutta Eline Ohm kampen slik ho starta den, med scoring. Med heile tre mål og dermed eit hat trick, vart Eline kampens toppscorar. Skjoldar knuste motstandarane med heile ni mål.   Les meir om kampen i Grannar.

Skjoldar I.L. på Norway Cup
G16 laget vann sølv i finalen.
(7.8.2011  SteinarS)  Skjoldar G-16 laget, som har spelarar frå Vikebygd, Skjold og Vats, blei historiske då dei kvalifiserte seg til finalen i Norway Cup 2011.

Les meir her.