Tomter i Vikebygd
Graveopning på Liofeltet
(17.11.2011 SteinarS)  19 tomter skal klargjerast i Vikebygd.  Opphavleg var planlagt 10 nye tomter på utvidinga av Liofeltet, men Tomteselskapet gjekk inn med 3,5 mill ekstra og byggjemodnar 19 nye tomter.

Torsdag 17. november var det høgtideleg markering av "graveopninga". Ordførar Ole Johan Vierdal fekk sitja litt bak spakane i Tveit Maskin sin beltegravar og grava litt i vegen inn til dei nye tomtene.  Dagleg leiar i Vindafjord Tomteselskap kunne strålande fortelja at i tillegg til desse nye tomtene så er det ennå plass til fleire hus i området.  -Ein kan lett utvida med fem tomter til, sa han. - Men først får vi selja desse 19 som nå vert klargjorde.  -Det bør kunna rekke eit år og to, seier han optimistisk.

Tveit Maskin, Leon Dyngeland, Ordførar Ole Johan Vierdal og varaordførar Steinar Skartland markerer "grave-opning" i utvidinga av Liofeltet i Vikebygd.  19 tomter vert klargjorde.

 -Kva tid kan første mann starta å byggja? var eit naturleg spørsmål som kom. -Først må vi få grava ferdig grøftene og få ned alle el- og telekablar, kunne Tveit Maskin sin representant fortelja. -Det kan fort gå nokre månader.  Vegen skal også asfalterast først.

Det er grunn til å tru at desse tomtene er lettselde.  Dei ligg flott til, både med tenke på terreng og natur, men også sentralt i Vikebygd.  -Borna mine brukar berre to minutt for å gå heimafrå og opp til skulen, fortalde Tore Espeland som har budd mange år her på Lio-feltet. Sjølv var han på spasertur dei få hundre metrane opp til butikken for å handle. 

 -Her i Vindafjord har vi reell arbeidsinnvandring, sa ordførar Vierdal.  Det er fleire arbeidsplassar enn fastbuande og mange pendlar frå andre kommunar inn til Vindafjord på jobb.  Ein av grunnane til at kommunen opplever befolkningsauke og stor interesse for å kjøpa tomter her.  -30 - 40 minuttar å kjøre frå Vikebygd så er ein ved fleire store verksemder.  Om vegen er smal så er her ikkje køkjøring. 

Ordførar og varaordførar kunne saman med dagleg leiar i Vindafjord Tomteselskap ynskja nye Vikebuar velkomne for å finna seg ei flott tomt i ei bygd som opplever at nye kjem reisande og slår seg til, sjølv om dei ikkje har lokale røter.   

Last ned reguleringskartet som PDF fil her

Tomtene ligg i Lio-feltet i Vikebygd. Kort veg til butikk, skule, idrettsanlegg og barnehage. Vikebygd er ei fantastisk bygd å busetja seg i. Gode oppvekstvilkår, mange fritidsaktivitetar og du kan nytta muligheitene naturen har. Vikebygd har naturopplevingar på sjø og i fjell.
Les meir om tomtene i Vikebygd HER 

Kontakt: Vindafjord Tomteselskap v/Leon Dyngeland Mobil 907 49748