Landhandelen i Vikebygd
Joker butikken held fram og utvidar opningstida
(27.11.2011 SteinarS)  Etter at Vikebygd Landhandel vart avertert for sal i sommar, har mange vore urolege for at bygda skulle bli utan nærbutikk.  Fleire interessentar har vurdert å ta over butikken, men så langt vikebygd.org kjenner til har alle desse trekt seg.

Bygda sin eigen kjøpmann, Rolf Alne, tok over butikken i 1999. Han har ikkje tenkt å leggja inn årane ennå, og har konkludert med å halda fram drifta av Jokerbutikken sjølv. Aksjeselskapet hadde i fjor ein omsetnaden på 7,26 millionar med eit driftsresultat på 182.000,-.

- Eg synes folk er flinke med å støtta opp om lokalbutikken med å handla her, seier Rolf som kan syna til utrekningar som viser at dei som vel å kjøra fleire mil for å handla pådrar seg vesentleg større kostnader enn det dei sparer på tilbodsprisar.

Bygget eig forretningsmannen personleg og leiger det ut til verksemda.  I tillegg til butikk er det utleige av to leiligheiter i andre etasjen og treningsstudio i kjellaren. Butikken er eit samlingspunkt i ei bygd som ser positivt på framtida.  Eit nytt bustadfelt med 19 tomter er nettopp opna.  Like ovanfor landhandelen, i Klokkargarden, har kvinner i bygda opna butikk med sal av husflidsartiklar.  Gamlatunet er eit annan midtpunkt, der Jakob Rødde leiger ut til selskap og har fast open kafè med bibliotek på onsdagane.  Fleire verksemder skaper arbeidsplassar på industrifeltet, og nede ved sjøen ligg "Plassabakeriet" med sin restaurant.  Dette er berre nokre eksempel på kva driftige personar i Vikebygd får til, og her er plass til fleire.

- Joker kjeda arbeidar med planar om å utvida opningstida på alle butikkane sine, fortel Rolf.  Noko som etter kvart vil gjelde Vikebygd Landhandel også.  - Her er snakk om å ha ope til klokka 19:00 vanlege kvardagar. Det blir lange dagar for den som skal driva butikk på landsbygda med ope seks dagar i veka. Rolf Alne ynskjer å få med seg ein som kan dela på ansvaret slik at det vert lettare å få seg fridagar.  Vi ynskjer han lukke til og trur mange er glade for at nærbutikken held fram.