VIKEBUEN arrangerte julemesse 19. november
Med fullt hus på julemessa

(19.11.2011 SteinarS)  Då Vikebuen opna julemessa si klokka 12 på laurdag 19. november, så var det fullt hus i storesalen.  Omlag 150 var møtt fram for å sikra seg julegåver, graut og drøs med sambygdingane.  For julemesse i Vikebygd er noko spesielt.  Her var korpset med og innleia arrangementet med fleire juletonar og korspsmusikk under leiing av Andreas Ulveraker.  Dirigenten som sjølv er dyktig musikar kjend frå Bytunets Antikvariske Jazzensemble, trakterer også trompeten medan han dirigerer. 

Lene Liodden syng i lag med Ingeborg, Miriam, Renate, Marlin og Mari

Lene Liodden hadde med seg ein jentegjeng som både kunne syngje og danse, før Vegard Skartland entra scenen og song ei rekkje songar akkompagnert av Arne Tveit på el piano.  Denne ungdommen har god songstemme, og her var songar med både nynorske og engelske tekstar.

Det var salsutstillingar både i den store salen og i grupperommet.  Kvinnene som har starta husflidsbutikk i Klokkargarden hadde flytta mykje av varene sine ned til Bygdahuset, der dei gjekk unna. Hanne Jorunn var svært nøgd med omsetninga både i Klokkargarden og på julemessa. - Det har vore mykje folk innom og dei er flinke med å kjøpa, fortalde ho.

I den minste salen møtte vi også Marit Eldholm, opprinneleg frå Sola, men nå busett i Ølensvåg og aktiv medlem i Ølen Husflidslag.  Ho hadde eit imponerande utval av flotte ting i strikk og hekling. - Eg var heilt tom for varer i vår, så alt du ser her har eg laga i sommar, kunne ho fortelje. 

Marit er også aktiv med å arrangere kurs i handarbeid gjennom husflidslaget i Ølen, og fleire som var innom sals standen hennar fekk gode råd om handarbeid. 

- Vi er 24 aktive i husflidslaget i Ølen, men har mange innom på kurs gjennom året, held ho fram.  Mellom anna ei gruppe innvandrarar frå fleire ulike land.  Dei snakka forskjellige språk, så då vart det mykje armar og bein til hjelp i kommunikasjonen, men kjekt var det.
 

Frans Frantson frå Ølen var også på plass med ei rekkje måleri han har laga.  Der var fleire lokale motiv frå fjord og fjell i Vindafjord.  Mellom anna eit han hadde måla av Plassabakeriet. 

- Eg tar ofte bilete av motivet og målar etter dette, fortalde Frans som ivrig synte fram måleria.  - Denne robåten fann eg i eit naust på Skigelstrand.  Naust og båt er slik det såg ut, men landskapet utanfor har eg laga til sjølv (midterste biletet nedanfor). 

Det var mykje sjø og båtar som går igjen i motiva til denne røynde målaren frå Ølen.

I tillegg til handarbeid, tresløyd og tolleknivar var det også fleire som selde mat av ulik slag.  Lefser, blåbærsyltetøy, saft mm var å finna.  Ola Harald Alne hadde teke forkledet på seg og var i full gong med å steike kaker på ei takke inne i litlesalen. - Eg veit ikkje kva som er i dei, men eg har nå fått jobben med å steika, sa han med eit smil.  Og den oppgåva klarte han godt.

 
Julemessa 2007 2008 2009 2010