|
Dommersnes
Motorcrossbane med forviklingar
 (3.5.11)
Øvst opp på industriområdet på Dommersnes ligg ein motorkrossbane som vart bygd
opp av entusiastar for nokre år sidan. Her har ungdom drive køyring med
ATV (firhjulingar).
 Jens
Morten Koltveit er ein av fleire som ynskjer å blåsa liv i denne aktiviteten
igjen og inviterte til møte for å få dette til.
-Interessa er der og mange er interessert i å få
til banen, seier Jens Morten, -men krav til sikkerheit gjer at me må investere
200.000,- kroner for å få banen forsvarleg og lovleg. Då må me anten ha ein 30
års leigekontrakt eller få kjøpa området.
Full av entusiasme beslutta dei at Karsten Veastad, tidlegare
formann i motorklubben, skulle kontakta kommunen om å få til avtale for området.
Kontakten vart derimot ein stor nedtur. Kommunen var negativ og kunne
fortelje at området var låst til framtidig produksjon av vindmøller. Dei
kunne ikkje love langsiktig avtale, og utan den er det ikkje råd å investere for
klubben.
Kva må
til for at banen skal vera lovleg?
-Vi må setja opp gjerde og køyra på grus. Til saman kan dette
koma på 200.000 kr. I tillegg vil me få opp brakker der klubben kan ha
verktøy og utstyr til å skru på ATV'ane. Klubben må også ha vaksne leiarar
som har gjennomført eigne kurs, fortel Jens Morten som peikar på trongen
for å få til aktivitet for ungdom som ikkje driv med fotball eller speidar. Han
er uroa over den aukande bruken av narkotika og rusmiddel mellom ungdom og
meiner at eit slikt tiltak vil kunna motverka at negative miljø for dra til seg
ungdomen. Nå vonar klubben at ordførar eller andre kan hjelpa med å finna
alternative område for banen.
|
