Vikebygd Landhandel - Nye eigarar?

Landhandel i bygda
1. oktober ikkje lengre deadline for handelsmannen
(21.8.11 SteinarS)  Forhandlingane med nye interessentar for Joker-butikken i Vikebygd har ikkje ført fram.  Rolf Alne sette tidlegare i sommar 1. oktober som datoen for å avvikla.  Han har samarbeida med Kjøpmannskjeda for å finna kjøparar.  Då han ikkje har kome i hamn med sal av butikken har han i staden arbeida for å få med seg ein yngre assistent som kan avlaste og gjerne etter kvart ta over drifta.  Dette ser nå ut til å vera på plass og Rolf vil framleis vera i Jokeruniform ut året. 

-Eg vil bruka tid og krefter på å lære opp den som skal overta, seier han. - Yngre krefter skal få tid til å prøva seg i rolla og få er faring før dei avgjer om dei vil kjøpa butikken eller ikkje.  Likevel ligg målet hans fast om å gje i frå seg butikken til andre.  Sjølv har han hatt fleire interessante tilbod om jobb, men avgjerd om desse får venta på seg. 
- Vikebygd er jo nøydde for å ha ein butikk, sånn er det berre, seier Rolf Alne til Grannar.  Grunnen til at han ynskjer å gje seg er m.a. saknet av fritid gjennom 13 år med butikk i Vikebygd.      

Klart for nye eigarar
Drifta held fram i Vikebygd Landhandel
(9.7.2011/19.7. SteinarS)  Nye, lokale eigarar ynskjer å ta over drifta av Joker butikken i Vikebygd frå hausten av, men det står ennå att ein del forhandlingar før dette er avklara.  Det er Kjømannshuset som har forhandla avtale på Rolf Alne sine vegne, om overtaking av drifta. Nye eigarar ynskjer å ta over både Joker butikken og huset.  -Eg vil ikkje du skal skriva kven det er ennå, seier Rolf, då ikkje alt er klart. 

Vi ynskjer dei lukke til med satsinga.

Rolf Alne har bestemt seg
Vikebygd Landhandel er til sals - nye vurderer overtaking
(7.6.11 SteinarS) 
- Eg har bestemt meg. Krava som skal oppfylgjast i form av rapporteringar og papirarbeid er for krevjande.  Sjølv når eg har ein fridag så er det butikken som svirrar i hovudet mitt, seier Rolf Alne.  Han informerte dei tilsette i starten av juni om at han nå vil gå til styrt avvikling av forretninga, og har alt hatt kontakt med personar som ynskjer å ta over drifta frå 1. oktober. 

Rolf har god tru på at drifta skal kunna halda fram. Når han nå gir seg så er det med gode resultat og flosshatten på.
  
Ein butikk med god drift og overskott.

- Joker butikken gjekk med eit bra overskot i fjor og omset for over 7 millionar i året. Eg har i tillegg fått tilsegn om tilskott frå handelsdepartementet til investeringar og opprusting. 

- Eg gir meg i ei oppgangstid.  Rekneskapen syner at eg ligg 2% over driftsbudsjettet både for fjoråret og hittil i år. 

- I dag er 10% av omsetnaden frå tipping.   Det er difor viktig at alle krefter blir sett inn for ei overtaking og vidare drift utan avbrot.  Eg skal i alle fall gjera det eg kan for å få det til, seier Rolf og legg til at:

- Investeringstilskottet føl med butikken så då er det betre at dei som vil overta står for opprustinga.  Om eg gjorde det nå så kan det henda dei nye ville ha gjort det på andre måtar, seier Rolf.  - Eg er òg råda til å senda ny søknad for dette året, noko som vil vera til fordel for dei som tek over. 

God støtte frå Norgesgruppen som eig Joker kjeda.

- Norgesgruppen gir god støtte til opplæring og tilrettelegging for dei som tek over. 

Nå blir vidare investeringar sett på vent og han har teke kontakt med joker og kjøpmannskontoret for å få hjelp med styrt avvikling og sal.  Det har alt vore andre interessentar og lukta på bedrifta, både lokale og frå andre stader, men han har ennå ikkje gått aktivt ut for å finna etterfylgjarar.  Det vil han gjera i samarbeid med Kjøpmannshuset. 

- Eg tenkte først på å få inn ein partnar, men nå blir det til at eg trekkjer meg heilt ut, fortel Rolf. 

Butikken som han tok over i 1999, er i eige AS.  Dei første fem åra var han leigetakar i bygget.  I 2004 gjekk han inn i Joker kjeda og kjøpte då forretningsbygget. 

Tilskottet frå Handelsdepartementet til investeringar i nye kjøler og datautstyr kom som eit resultat av at han deltok i Merkur-programmet.  Rådmannen ga si tilråding då han søkte.  Tilskottet vert gjeve til 50% av kostnadane med investeringar i utkantbutikkar og i tillegg til kompetanseeheving og kurs.

Ein sjømann gjekk i land.

Rolf Alne sigla mange år til sjøs som stuert i utanriksfart.  Då han gjekk i land etter mange år høvde det å ta over landhandelen i Vikebygd. I 2009 feira han 10 års jubileum for butikken og inviterte 255 gjester til bygdahuset.  Han vart også kjend i vide krinsar for å setja i gong eit helseprosjekt.  Det tok til med at han måtte ta hand om eiga helse og gå kraftig ned i vekt.  Noko han klarte med glans.  Dette var nok og bakteppet for at han starta opp eige treningsstudio i kjellaren på butikken.  Her vart det dekning både i fjernsyn og i aviser.

Ein god butikk som folk nyttar dagleg.

Folk har vore trufaste overfor butikken i Vikebygd. Omsetninga har vore jamn og stigande basert på daglegvarer. I 2010 omsette Vikebygd Daglegvare AS for 7,276 millionar kroner med eit positivt driftsresultat på 182.000 kroner.  For dei som har trong for det så køyrer han og ut varene og leverer dei på trappa.  I tillegg til dei som bur fast i bygda er ein stor kundekrins alle som har hytter og ferierer i denne vakre bygda.

Ein aktiv deltakar i bygdesamfunnet.

Men Rolf driv ikkje berre med butikk og trening, sjølv om det tek mykje av tida hans.  Rolf engasjerer seg i det som skjer lokalt og er m.a. å finna både i Grendautvalet og i soknerådet, der han er aktiv i diakoniutvalet.  Han har meiningar om mangt og mykje og veit å dra i trådane for å få ting til å skje.  Slik vart Rolf ein av dei som stod i spissen for ein stor konsert som fylte kyrkjebenkene hausten 2010.  Når advent kjem så må sjølvsagt julegrana tennast med korpsmusikk og fakkeltog. Og når Hårfagrerittet skulle av stabelen fekk han sett saman eit sykkelteam frå Joker Vikebygd som fullførte løpet.  Han sjølv var ein av sykkelistane som fullførte det harde løpet på 53 km, der løypa delvis gjekk i fjellterreng. 

Det står det respekt av.  52-åringen veit nok å finna på sprell og i framtida, så vi kan berre ynskje han lukke til vidare og vona det kjem gode etterfylgjarar med butikk i Vikebygd til hausten.

Les meir på Granner.no: Skjebnetid for butikken
Team joker Vikebygd i Hårfagrerittet 2011