|
Sal av gamleskulen?
Interessentar vert avklara om to veker
(9.7.2011/12.7.11 SteinarS)
Gamleskulen i Vikebygd har i
lengre tid vore til sals. I flg Grannar så er det nå interessentar til bygningen
og salskontrakt kan vera underteikna innan eit par vekers tid. (link
til Grannar)
Leiar av Grendautvalet, Rune Hetland, er svært overraska over meldinga.
-Ordførar Arne Bergsvåg var på møte med
Grendautvalet for ikkje lenge sidan og eg
oppfatta det som at grendeutvalet skulle takast med på råd om
skulebygget si framtid, fortel Hetland. Dei har ikkje høyrt noko meir før dette
stod på trykk i Grannar på torsdag.
Skulebygget er i dårleg forfatning og
ligg svært nær barnehagen og den nye skulen. Ballbinge, grusbane og sykkelskuret
til skulen omkransar bygget. Det er vanskeleg å byggja om og nytta bygget til
anne verksemd utan å flytta desse. -Det ville vore betre for kommunen å nytta
300.000 kroner til å riva og fjerna bygget, og så tenkja langsiktig i bruk av
denne sentrale tomta til beste for bygda, seier Rune Hetland. Han er uroleg for
at bygget kan få ein bruk som ikkje er positivt for bygda og at vi vert slitande
med dette gamle bygget i mange år.
 Leiaren
i Grendautvalet har sjølv tankar om korleis tomta og framtidig bygg her kan
nyttast.
- Det har vore tankar om at
ballbinge, grusbane og leikeplass kan flyttast nærare Lio-feltet. Heile området
ville då kunna frigjerast til nye, spennande føremål.
Men her er det svært viktig at
kommunen i samarbeid med grendeutval og bygda kan ha ein prosess for å sjå
korleis eit så sentralt areal kan nyttast best muleg til beste for bygda og
kommunen.
På
drøsestova i butikken gjekk diskusjonane høglydt om planane for bygget.
Dei fleste i bygda meiner nok at riving av gamleskulen er det beste, og at
kommunen deretter bør vurdere å nytte denne tomta som vert nemnd som
"indrefileten i bygda", etter ein meir heilskapeleg plan for sentrum av
Vikebygd.
|
