(11.12.2011 SteinarS)  Det har vorte ein tradisjon i Noreg med julebord første del av desember.  Det er ikkje berre i julehelga at ein kan feita seg opp lengre.  På Gamlatunet er det inkje unntak.  Jakob Rødde har hatt fleire julebord kvar veke. 

Bonden med garden sin midt i bygda har synt at han kan meir enn å stella jord og dyr.  Det er berre godord å høyra om maten som vert servert i dette gamle bygget han har restaurert, noko som ga han kommunen sin byggjeskikks pris for nokre år sidan.  Her er bibliotek, kafe og selskapslokaler. - I helga har eg avløysar, men midt i veka blir det travelt, seier Jakob som både må passa på dyra i fjosen og grytene på kjøkkenet.

Tilsette i barnehage og skule i Vikebygd valde også i år å samlast til julebord her 9. desember.  Pinnekjøt og riskrem var på menyen.  Eit julebord kanskje litt utanom det vanlege, likevel?  Her var mange innslag som ga god stemning og trivsel utover kvelden. 

 
Allsong og konkurransar var mellom aktivitetane, men også godord, gåve og song til Kjetil Andre som nå avsluttar eit år med sivilteneste i barnehagen.

Dei visste å laga til eit arrangement med høg trivselsfaktor, der også den betre halvdel fekk vera med.  Så klarer Jakob å få plass til omlag eit tredvetals vaksne til middag i same stova.  Ein sit tett på kvarandre, noko som berre gjev ekstra god stemning og høve til å verta godt kjende med kvarandre.

Julebordet her minner meg om juleselskapa som ein hadde då eg var liten.  Ikkje uvanleg at naboar vart inviterte til å koma saman i ei av dei små stovene.  Husa hadde ofte to stover.  Her var det rigga til med langbord i U langs veggene.  Store og små sessa seg langs borda og det kunne vera retteleg triveleg. 

Kyrkjebladet Hyrdingen sitt julenr

Nr 6 av bladet kom i alle postkassane 8. desember, men kan også lesast på internett, her.

Som vanleg inviterte Hyrdingen alle skulane i Vindafjord til å teikne med ein julesong som tema.  Dei beste barneteikningane er denne gongen på trykk i Hyrdingen.

Du kan også sjå fleire av utgåvene her, og grafisk framstilling av kor langt innsamlinga til ny kyrkjelydspedagog-stilling er komen.

www.hyrdingen.no