Vikebygd ved Ålfjorden

Vikebygd, Vikevik, Vik, Austre Vikebygd
av Steinar Skartland 9.1.2010. Sist endra 3.1.2015

Godkjende skrivemåtar:
Østre Vikebygd
(godkjend av Kartverket i 1952).
Austre Vikebygd
(godkjend av Kartverket i 1978),
Vikevik
(godkjend av Kartverket i 1978).
Vikebygd
(godkjend av Kartverket i 1991),
Vikevik
Namn på den store og breie vika på austsida av Ålfjorden, ved Vikebygd. Eit namn som er nytta langt tilbake. Frå den tida fraktebåtar jamleg la til ved kaien stod det skilt her som oppga stadnamnet og hamna til å vera Vikevik kai. Denne har også namnet: Prestabrygga. Vikevik vart også brukt som namn på grenda som låg her inst i vika og som nå utgjer sentrum av Vikebygd.
Vikebygd
Vikebygd omfattar eit større område og vart namnet på kommunen som omfatta bygdene på austre og vestre side av fjorden. Kommunen eksisterte frå 1.1.1902 til 31.12.1963. Krinsane i Austre Vikebygd vart då rekna Aarvik, Veastad og Vik (med 578 innb.). Desse tre krinsane vert ennå rekna som grunnkrinsar i offentlege registre.
Vik
Vik er namnet som også i dag vert nytta på sentrum av bygda. Vi finn dette igjen i Vik Skule, Øvre Vik og Nedre Vik. I året 1431 er kyrkjesoknet kalla "Vika."
Austre Vikebygd kyrkje
Fyrste gongen Vikebygd kyrkje er nemnd i skriftleg materiale, er i året 1315 (eller 1313), og var då kalla "Viksar kyrkje." Vi kjenner ikkje til kva tid denne vart bygd, men det var truleg på 1200-talet, og var bygd som ei stavkyrkje. Ho skal ha stade på same staden som kyrkja vår står i dag, heilt fram til året 1682. Då vart ho nedriven og ei ny kyrkje vart bygd. I året 1431 er soknet kalla "Vika."
Les meir om kyrkjene her.
Ålfjorden (Henta frå Wikipedia): "Ålfjorden er ein 27 km lang sidefjord til Bjoafjorden og Hardangerfjorden langs fylkesgrensa mellom Hordaland og Rogaland i kommunane Sveio og Vindafjord (tidligare Ølen kommune). Den innerste delen av fjorden ligg i Tysvær kommune. Fjorden har innløp i nord mellom Bjoaneset ved bygda Svolland i aust og Kvitanes på Tittlesnes i vest.

Fjorden går så rett sørover og eit stykke inn i fjorden ligg Årvik i ei bukt på austsida. 5 km lenger inn i fjorden ligg Vikebygd på austsida ved vika Vikevik. På vestsida ligg dei mindre bygdene Framnes, Oa og Erve. Ved Erve strekkjer Ervebukta seg 3 km vestover og er mest som en liten sidefjord å rekna.
(Les meir om fjorden på Wikipedia).


Næringsliv - Vik Skule og Barnehage - Kyrkja - Kvamsåsen Rundt - Fotball - Orientering - Speidarane - Laurdagsklubben Vikebygd ligg i Vindafjord Kommune på grensa mellom Rogaland og Hordaland. Her er 560 fastbuande (men i helgar og feriar kan talet mest dobla seg). - I sentrum ligg barneskule og butikken Vikebygd daglegvare kor det også er treningsstudio! - Nede ved fjorden, kor det i gamald tid var bakeri, finn vi serveringsstaden "Plassabakeriet" kor folk kjem langvegs frå for å få oppleva maten og stemninga. Av og til fyrer eigarane opp i den gamle bakaromnen og lagar brød og boller som i tidlegare tider. I Juli kvart år vert Vikebygdfestivalen arrangert, -kombinert marknad og fiskefestival ved fjorden. - Like oppfor kaien ligg den kvite Kyrkja i bygda. Ofte vert ho kalla katedralen i kommunen. Ei vakker murkyrkje, den 5. i talet gjennom 800 år, omgitt av ein velsteld kyrkjegard. Vidare oppe ved hovudvegen ligg "Gamlatunet." I dette gamle restaurerte huset kan ein leige til selskap og servering med historisk sus. Om onsdagane er her ope bibliotek. - Sør i bygda, oppe på garden Bjordal, finn vi Bjordalstunet, ein stad både for kurs, selskap, overnatting og servering. - I fjella rundt bygda er det sett ut "nutakassar" der fjellvandrarane kan skriva seg inn. Det vankar diplom og merke til dei som tek turen innom alle kassane i sommarhalvåret. - Frå sentrum i bygda går også vegen opp til Vikestølen. Nå er her ein utfartsstad for alle som vil ut på tur. Anten det er til det årlege Vikestølsmøtet kvar sumar, eller Vikestølsmarsjen om hausten, eller kanhende ei friluftsgudsteneste? Også Arquebusmarsjen frå Eikås til Langåsdalen går via Vikestølen. Både skuleklassar, barnehage, speidarar og andre i grupper eller for seg sjølv, tek turen hit både titt og ofte, om dei har lyst på ein tur til fjels.- litt over ein time å gå på skogsvegen frå Vikebygd. Vil du oppleve meir av denne bygda? Ja, då får du ta ein tur då.

Vikebygd, Vikevik, Vik, Austre Vikebygd av Steinar Skartland 9.1.2010. Sist endra 3.1.2015

Vikebygd, Vikevik, Vik, Austre Vikebygd
av Steinar Skartland 9.1.2010. Sist endra 3.1.2015