Kyrkje vedlikehaldet "Sprell Levande Gudsteneste"

Sprell levande kyrkje
Barna fylte kyrkja med lovsong
(29.10.2011 SS)  Så var kyrkja klar for nyopning. Stillaset stoder der ennå, men inne var alt som før. Det var nesten 100 store og små som fann vegen inn i kyrkja. Alle fire-åringane var spente, dei skulle få ein bibel og var spesielt invitert.  Det var kateketen vår, Britt Karstensen, som leia den sprell levande gudstenesta og hausttakkefesten.  Borna kom inn i tog og hadde med seg frukt, grønsaker og blomar som dei pynta med framme i koret. 

Etter kvart fekk borna koma fram og syngja for dei vaksne, og jubla for Herren.  Det var laurdagsklubben som song og viste stor glede. 

Så skulle Britt fortelja om Jesus.  Ho bad alle borna koma fram og setja seg fremst på golvet.  Då reiste fleire mannfolk seg og kom fram med plakatar.  "Ikkje lov å le", "Born ikkje adgang!", var mellom det som stod på plakatane.  Dei måtte fint gå til sides og stilla seg i ein krok, der dei og fekk høyra om mødrene som kom med borna sine til Jesus.  Læresveinane ville jaga dei vekk, Jesus har ikkje tid, sa dei.

Men Jesus kom med den utsegna som har vorte ståande som eit symbol på kva Kristendommen står for:  "La borna koma til meg og hindra dei ikkje, for Himmelriket høyrer slike til!" sa han.  Så kunne dei vaksne snu seg og plakatane sine, og syna fram teksten på den andre sida: "Kom", "Jesus elskar alle born" stod det mellom anna. "Du må ta i mot Jesus på same måte som borna gjer det," fortalde Brit Nelly, som spela Jesus i dette rollespelet.  Ei preike som inkluderte både borna og dei vaksne.  Etter gudstenesta fekk alle vera med på eit måltid og mange stoppa igjen for å prata og få seg kake eller frukt.

Kyrkja vert pussa opp til jubileum
Kvit puss blir varig og reduserer vedlikehaldet
(8.10.11)  Framdrifta med kyrkja er noko forseinka, men bak presseningane står eit prakt-bygg som er i ferd med å få på plass festdrakta si. Metoden som vart vald er ei spesiell tilpassa sandblåsing som har fjerna gamal måling og laus puss. Deretter er påført 4 lag med puss der siste laget er ferdig kvit farga puss med silikat.  Den skal det ikkje vera trong for å måla seinare.  Kostnaden er på 1,2 millionar + mva.

Arbeidet ligg litt etter ruta, men soknerådet vonar at kyrkja skal vera klar til gudstenesta den 30. oktober.  Det kom ein del støv inn i kyrkjerommet under sandblåsinga.  - Det skal vaskast ut på dugnad, fortel Britt Nelly Tveit som er leiar i soknerådet og vonar folk vil stilla opp og hjelpa til.

I tillegg til pussarbeidet vert der arbeida med å reparera vindaugo som har små ruter med farga glas. Vårvik Glas har denne oppgåva, men det har synt seg vanskeleg å få utført dette samstundes som murarane held på med pussarbeidet. Dei arbeider på alle sider samstundes og må dekka til vindaugo når dei pussar. Ein frykta lenge at det var for store roteskader i treverket her, men dette var ikkje så omfattande som frykta. - Det er berre rote i vannstokkane, og dei har eg skifta ut, seier Geir Vårvik, som har halde på med kitting og reparasjon på staden.  Men det vanskeleg å få koma til samstundes som murarbeidet pågår.  Likevel er det viktig at dette kan gjerast før stillasa vert fjerna.

Les meir om kyrkjevedlikehaldet HER.

Vikebygd kyrkje stengd for vedlikehald
Vedlikehaldet av kyrkja i Vikebygd er i rute
(23.8.11 SteinarS)  Sivilarkitekt Arne Tveit, som er soknerådet sin representant for å fylgje opp det pågåande arbeidet med kyrkja, informerte tysdag kveld soknerådet om framdrifta. - Arbeidet er i rute og stillasa kan fjernast innan midten av oktober, fortalde han, og ga fylgjande statusmelding:

- Metoden som vart vald er ei spesiell tilpassa sand-blåsing. Gamald måling og laus puss vert slik fjerna, men mesteparten av den gamle pussen er bra og vert verande. Neste steg nå er å behandle pussen, og murarfirmaet skal nytta 4 lag med puss der siste laget er ferdig kvit farga puss med silikat, som ikkje seinare treng/skal å malast.
Kostnaden er på 1,2 millioner + mva.

Samstundes held Geir Vårvik, i Vårvik Glas, på med vedlikehald av vindaugo. Ein del måtte han ta ut og heim til eige verkstad.  Skjold Trevare er bestilt til reparasjon av inngongsdør mot sør. Kalstveit og Vik: er bestilt til å fylgje opp trearbeider oppover etter kvart.  Dei skal vurdera treverket ute mens det er stillas på plass.  Takrenner etc er det førebels ikkje gjort vurderingar av, men Kalstveit og Vik skal vurdera desse. Treverk på tårnet må målast samstundes som det er stillas, og av fagfolk.  Stillaset vert ståande fram til midten av oktober.

Det er kome ein del støv inn i kyrkja frå sandblåsinga trass i at murarfirmet sette overtrykk på innvendig i kyrkja, mest i austenden. Ein trur ikkje orgelet har teke skade. Utvasking av kyrkja er tenkt gjort på dugnad.

Soknerådet vedtok i dette møtet at bedehuset i Vikebygd skal nyttast til gudstenester og kyrkjelege handlingar i tida som kyrkja er avstengd.  Sprell levande Gudstenesta med Britt Karstensen den 30. oktober, er truleg første gudsteneste i det oppussa bygget.
 

Vikebygd kyrkje
Vedlikehaldet av kyrkja er i gong
(14.7.11 SteinarS)  Dei siste dagane har det kome opp stilas rundt heile kyrkja.  Det er starten på vedlike-haldet der muren skal sandblåsast for å fjerne gamal maling. Deretter skal den få ny puss og maling, eit arbeid som Murmeisterfirma R. B. Johanne-sen har fått.  Kyrkjeverja har informert soknerådet slik:

Etter budsjettvedtak i Vindafjord kommunestyre skal Vikebygd kyrkje pussast opp i inneverande år. Sidan dette m.a. gjeld puss av utvendig mur er det avgjerande viktig at dette vert gjort i sommarhalvåret. Vedlikehaldsperioden går difor frå dags dato til medio oktober. Det vert nå reist stillas rundt heile kyrkja - og kyrkja skal vidare pakkast inn med plastduk i vedlikehaldsperioden. Vidare skal alle vindauga mot sør restaurerast. Desse kan ikkje takast ut av veggen, men må vedlikehaldast på staden. Dette medfører sjølvsagt konsekvensar for bruken av kyrkja, som då i realiteten vert stengd fram til oktober. 
 
Konkret inneber dette:

a) Vigslar. Det er gjort avtale om to vigslar i perioden. Den eine vert flytta til Skjold kyrkje, den andre til godkjend vigselstad i friluft - Parken i Vikebygd, begge flyttingar i samråd med brudepara.

b) Gravferder: Vil i hovudsak gå frå Skjold kyrkje til Vikebygd kyrkjegard.

c) Gudstenester: Vil verta haldne i høvelege lokale etter nærare avtale mellom sokneråd og sokneprest.

Les meir HER
 

Vedlikehald i gong ved Vikebygd Kyrkje
Kyrkja vert stengd i tre månader
(9.7.2011 SteinarS)  Murveggene skal sandblåsast utvendes og behandlast på ny.  Arbeidet tek til med stilasbygging og innpakking av kyrkja, nå i ferien.  Murmeisterfirma R. B. Johannesen har fått oppdraget.

For å sikra at det materialet som ein fjernar under sandblåsinga kjem ut og ikkje inn i mur og bygg, skal det setjast eit overtrykk med luft inne i kyrkja.  I tillegg skal kyrkja pakkast inn.  Derfor er det heller ikkje mogeleg å nytta kyrkjebygget til gudstenester, bryllaup, gravferder eller andre arrangement i tre månader frametter.  Gudstenesta i august er alt tillyst som friluftsgudsteneste i parken.  Til andre gudstenester og arrangement kan det verta aktuelt å nytta bedehuset eller andre kyrkjer i nabo bygdene.

I Vindafjord er det likevel to plasser utanom kyrkja som er godkjent til å halda vigsler av folk som vil gifte seg.  Det er parken med den gamle kyrkjetomta og på Vikestølen.  Med fint vêr kan gudsteneste ute i parken vera ei fin handling.  Her kan og setjast opp telt dersom vêret skulle vera utrygt. 

Søndag 10. juli klokka 17:00 blir det siste gudsteneste i kyrkja før murarbeidet er ferdig.