Vikebygd Motorbåtforeining

Dugnadsbygda.
Tredje dag med dugnad i båthamna
(11.6.11 SteinarS)  Vikebygd Motorbåtforeining har hatt heile tre laurdagar med dugnad i år, den siste var 11. juni.  Ein av dei som var på dugnaden var Geir Inge Årsteinsen.  Han var i full gong med å måle veggene på huset der dieselpumpe og tank er plassert. 

Gjennomsnittleg timetal med dugnad pr vikebu har ingen rekna på, men det er ikkje få timar kvar og ein yte i løpet av eit år på ulike måtar.  Enten som medlem i eit lag, eller ved å stille opp der det trengs ei hjelpande hand. Eg trur vi godt kan slå fast at Vikebuen ligg godt over landssnittet her.

Styret i Vikebygd Motorbåtforeining er i 2011:
Sigbjørn Tjoflot, Formann
Odd Nesse, Styremedlem
Roger Stene Bauge, Styremedlem
Svein Harald Barane; Kasserar
Sevald Vestre, Styremedlem
Geir Inge Årsteinsen, Varamedlem
Kåre Tordal, Varamedlem

Utlodding for å berge liv.
Vikebuen kjøper hjartestartar til bygdahus og idrettsplass
(11.6.2011 SteinarS)   Ved eit bord utanfor Landhandelen sat Anne Marie Bjørnevik med loddbok på laurdag. Det var mange som stansa opp her før dei gjekk inn for å handla. 
- Det er Vikebuen som samlar inn pengar til å kjøpa hjartestartar, fortel ho.  - Den skal plasserast på Bygdahuset.  Her er ofte store arrangement og mange deltakarar.  Ein veit aldri kva tid det kan verta bruk for hjartestartaren.  Den kostar omlag 20.000 kroner. 

På bordet framføre henne ligg eit stort heklateppe.  Det er sett saman av mange mindre hekla firkantar og Anne Marie fortel at det er mange forskjellige som har delt på å hekla kvar sine bitar som så er sett saman.  Likevel er det imponerande å sjå kor dei passar saman. Eit flott teppe som får ein vinnar til hausten.

Det er ikkje uvanleg å finna Anne Marie med loddbok på butikken.  Gjennom åra har ho samla inn pengar til mange prosjekt både i Afrika, der ho sjølv har vore fire gonger, og til andre samanhengar.  Ho likar å selja lodd og å kunna hjelpa der det trengst.
 

Korleis kan så ein hjartestartar på bygdahuset vera til hjelp?
Hjartestans kan ramma både unge og eldre.  Det har vore fleire tilfelle med hjartestans på unge menneske ved t.d. idrettsarrangement, også i vår kommune.  Då er det viktig at dei som er til stades straks set i gong hjerte-lunge redning.  Dvs legg begge hender på brystet på pasienten og presse raskt ned.  30 press og så to innblåsingar gjennom munnen, og så nye press på brystet.  Dette vil ikkje få hjarta i gong igjen, men vil halda blodsirkulasjonen i gong slik at hjernen får oksygen, inntil hjartestartar kjem på plass.  Hjartestartarane er i dag sjølvforklarande og kontrollerer sjølv om det er trong for elektrisk støyt.  Kort sagt:  Gjer du ingen ting døyr pasienten etter 10 minutt.  Prøver du kan eit liv bli berga.  Det er i dag stadig fleire som har kurs og opplæring i bruk av hjartestartar (inkl. underteikna).  Uansett hjartestartar eller ikkje:   Ring 1-1-3