(14.11.2012 SS)  Dei er mange og dei vert lærte opp til omsorg for andre menneske.  Onsdag 14. november gjekk småspeidarane frå dør til dør med bøsser, mens storspeidaren stelte i stand kafé på bedehuset. Alt for å kunna gje si støtte til KFUK speidarane i Bangladesh sitt arbeid for å betre oppvekstvilkåra for born i dette fattige landet.

- Totalt er det 66 med små og store i speidaren i Vikebygd nå, kunne gruppeleiar Arne Tveit fortelje.  - Men berre 20 har betalt kontingent i år.  Speidararbeidet får Frifondmidlar frå staten ut i frå talet på betalande medlemmer, og han oppfordra alle om å betala inn kontingent snarast. 

Frifond er ei støtteordning oppretta av Stortinget for å betra dei økonomiske rammevilkåra for demokratisk og frivillig aktivitet i lokalsamfunn.  Ei lang rekkje organisasjonar er medlem i frifond, og her går stønaden til hovud-organisasjonen, som igjen fordeler dette på lokallag.  Betalande medlemmer fører derfor til at hovudorganisasjonen får betre høve til å leggjar tilrette for arbeidet både på landsplan og lokalt.

Men denne dagen var alle i aktivitet.  Småspeid-arane kunne skilte med 5.500 kroner i bøssene
og på kaféen selde dei for 3.300,- kroner.
 

Mange born og foreldre ville kjøpa kaffi, saft og vaflar av speidarane. Her er det
Dag Nagel-Alne som gjer opp for maten, der alt kosta 10 kroner pr stk.

- Speidarane kan nå senda 8.800 kroner til Globalaksjonen, fortel Øyvind Valen, og legg til: - Speidarane takkar alle som tok i mot småspeidarane ved dørene og som besøkte kaféen.  
 

Når speidarane lagar til Global kafé så får ein også med seg meir enn mat.  Iselin Eidhammer Tveit hadde andakt der ho peika på at i speidarlova har det å hjelpa andre også stor fokus.  Derfor er det viktig for speidarane å kunna delta og å læra å hjelpa andre.

Og så måtte det sjølvsagt nokre leiker og sketsjar til, når det er speidaren som står bak arrangementet.  Også her fekk speidar-ungdommane visa sine kreative sider, til glede for dei som deltok og dei som såg på.  For speidarorganisasjonen er det også viktig med leiartrening. Dette er nok erfaringar og kunnskap som ungdommane får nytte for også seinare i livet.  Mange av dei finn ein igjen seinare i leiarstillingar innan arbeidsliv, kyrkje og friviljuge organisasjonar.

Ungdommane i Vikebygd er både heldige og priviligerte som har så mange gode og positive tilbod som her finnes.  I forhold til folketalet tør underteikna påstå at det må vera ei av dei mest aktive bygdene innan frivillig arbeid.  Noko som vi har fått gleda av å presentera mange gonger på denne websida om bygda.
  

Globalaksjonen er KFUK-KFUM-speidarane og Noregs KFUK-KFUM sin innsamlingsaksjon til inntekt for KFUK i Bangladesh. Pengane blir forvalta av KFUK-KFUM Global.  Les meir her.