Fjelltur i skoddeheimen
Svært godt merka sti til Ulserhaug

(11.7.2012 SteinarS)  Tysdag 10. juli var det både sol og flott ver på dagen, så det freista med ein fjelltur.  Kjørte til Bjordal, gjekk opp på Bårefjell og vidare innover mot Ulserhaug.  Det var seint på dagen og halvvegs kom skodda sigande.  I ukjent terreng hadde eg snudd, men denne turen har eg teke mange gonger.  Kart og kompass er normalt med i sekken, og stien var godt merka, så eg fortsette til målet.   Sikten vart stundom liten, men stien er så tydeleg merka at det ein del stader berre var 10 meter mellom merkene. Og med kompasset i handa var eg trygg på retninga.  Sikten veksla, av og til under 40 meter, men så letta det litt igjen så eg såg landskapet rundt meg.

Godt merka sti, her ved foten av Ulserhaug.

  
Stien oppover frå Bjordal mot Bårefjell.    -               Liten sildrebekk innpå fjellet.

Prøvde som ein test å slå på gps'en på HTC-mobilen (noko eg aldri stoler på i fjellet).  Fann fort ut at den er god på landevegen (der ei hyggeleg damestemme seier: "Kjør ut av rundkjøringen" eit par sekund etter at eg har kjørt ut av rundkjøringen).  Men på fjellet har den sine store problem.  Først skal den motta signal i frå tre (helst fem) satellittar og ut frå differansen i tid signala tek frå satellittane til mobilen, rekna i miliontedels sekund, rekna ut koordinatane for posisjonen.  På grunn av fjell etc. kan det henda at han ikkje får signal frå mange nok satellittar samstundes.  Så skal han senda koordinatane via mobil nettet til ein server (dersom det er dekning for mobil).  Deretter skal han laste ned kartet for området du er i (dersom det er 3G dekning.... dersom det ikkje er det, kan han laste ned via vanleg mobilnett, -dersom det er dekning, men det tar lang tid).  Så kan han endeleg vise eit grovt kart med visning av posisjonen (avvik på 15 meter) og diverse data, men inga stemme som seier at det er eit myrhol rett framfor deg i tåkehavet.  Meir info.

Gps-kartet er vesentleg dårlegare i fjellet enn eit vanleg turkart kjøpt på ein bensin-stasjon.  Jo, han viser koordinatane og ei slags løype.... men ein gps på mobiltelefon, er som eit leikety å rekna samanlikna med gps og digitalekart som vert nytta på td. skip eller ein satellittstyrt amerikansk skurtreskar.  Så eg sverjer til turkartet, som tydeleg viser bekker, myrar, knausar, stiar og treholt.  Med kompasset i tillegg, så går det bra.  Og dette går heller ikkje tomt for straum.

Men takk til dei som har gjort kjempejobb med å merka stigen til Ulserhaug så tydeleg.
Bilete frå turen her.