Hyttestyret for Vikestølshytta inviterte
100 gjekk Vikestølsmarsjen søndag 2. september

Åge Holsbrekken konsentrerer seg i hesteskokastet medan dei yngste studerer teknikken nøye.

(2.9.2012  SteinarS)  Jarle Sandsgård hadde full jobb med å signere diplomar etter kvart som turgåarane nådde fram til Vikestølen søndag 2. september.  Den årlege Vikestølsmarsjen vart som vanleg arrangert av hyttestyret, som har representantar frå Bjoa og Vikebygd idrettslag. Omlag 100 deltok i år i marsjen som gjekk både frå Eikås på Bjoa og frå Vikebygd.

Kaker, brus og kaffi gjekk godt unna i kiosken.  På kjøkkenet hadde dei sikra seg to store kjelar med lapskaus, men den eine var mest heilt full då dagen var over.  Gråvêr og regn om morgonen hadde gjort at færre tok turen i år. Difor var det også spredt utover dagen kva tid folket kom fram. 

Ute var det hestekokasting og leik, og inne i hytta kunne ein kjøpa lodd og få røma unna knotten som beit godt ute. Øystein Sandsgård vann hesteskokastinga med 23 poeng. Alle som går til Vikestølen kan skriva seg inn i ei gratis loddbok. Til vanleg er det omlag 700 registrerte, men siste året var det heile 958 innskrevne.  Mellom desse vart det trekt ut ein vinnar som fekk ryggsekk som premie.  Dette vart Anette Hetland, som hadde vore på stølen 19.august. 

Ein kunne gå frå Rotvoll eller Vikebygd, mellom kl 11:00 - 13:00.  Derfor var dei første alt på veg nedover att når dei siste gjekk turen langs Langavatnet.

Sjå plakaten her.

Les også om arrangementa som var
i 2011 eller solskinsdagen i 2010

Til fjells søndag 26. august
Det kokar i Longavatnet
(1.9.12 SteinarS)  Det var med stor undring eg vart ståande å sjå utover Longavatnet då eg hadde passert stemmen.  Det koka.  Som ein geysir pressa store luftmengder seg opp frå vatnet 4-5 meter ut frå land i nordenden.  Nett der ei vassleidning ålar seg opp frå vatnet. Eg vart ståande lenge å sjå på dette.  Gir det seg ikkje snart?  Nei det heldt fram med like stor kraft og med korte pausar. Kunne det vera noko gale med vassleidningen? Men den syg jo inn, og skal ikkje blesa ut.

Eg fekk forklaringa av leiaren i Vikebygd Vassverk, Ola Harald Alne, etter at han hadde undersøkt dette nærare med andre.  Jo, det er lagt ei vassleidning frå Trodlavatn og Indre Halvarhaug bekken, som skal gje meir vatn inn i Langavatnet.  Dette for at det skal bli meir avrenning frå stemmen og ned til produksjon av elektrisitet i kraftstasjonen. Dette går via drikkevatnet og gjer det mogeleg å regulera vassmengda betre. Denne leidningen syg også inn luft, og det var det som spruta opp der like ved stranda. 

Elektriske luker til demninga i Vassverket.
Det er elles planar om å setja inn automatiske luker i demningen. Med kraft frå solpanel skal ein el.motor kunna opna og lukka lukene, og slik regulera vatnet i elva ned mot kraftstasjonen si demning.  Er det  nok vatn for kraftstasjonen kan ein slik magasinera opp vatn i Langavatnet. 

Mykje humus i Langavatnet grunna vegetasjon
Då demninga vart laga og vatnet demd opp, vart ikkje vegetasjon eller jord fjerna langs vatnet.  Dermed er det jamt tilsig av humus til Langavatnet, som er mørkt og brunt på farge. Leiar i Vassverket fortel at rensestasjonen fungerer svært godt og sikrar at det er reint vatn som kjem fram til forbrukarane.  - Men rensemembranane må vaskast ofte, fortel Ole Harald.  - Dette går automatisk og skjer omlag kvar halve time.  Fleire kundar kan stadfeste at det er reint og godt vatn som kjem fram til forbrukarane, og det vart vesentleg forskjell då dette renseverket vart bygd.
 

Samarbeid mellom Vassverket og Vik Kraft
Regulerer vannstanden i Langavatnet
(4.9.12 SS) Etter at vi skreiv at det "kokar i Langavatnet" har Per Vik kome med denne forklaringa:

-Dette har ingen ting med vannledningen til Vikebygd Vassverk å gjøre. Den ledningen er nedgravet, og har inntaket på 6-8 meters dyp langt inne i vannet. Ledningen det "koker" av er en ledning Peconor anla for snarere å kunne fylle Langavatnet. Ledningen har sitt utspring i Indre Halvardshaugbekken der det er støpt en liten inntaksdam.

Ledningen var i en periode ute av drift, men er nå tatt i bruk igjen, sier Per Vik.
-Vik Kraft har rett til å kunne regulere vannstanden i Langavatnet, og det er da en fordel for alle parter, -også for Vikebygd Vassverk- at vann-standen kan heves forholdsvis snart, på den måten sikrer vi at det kommer nok vann i magasinet.

Reguleringen er ellers en stor fordel for vassdraget da en på denne måten kan dempe de største flommene i både Bjoraelva (Plassaelva) og Vikeelva.

Tilførsel av vann fra bekken fra Trollavatnet har ingen ting med kvaliteten på drikkevannet å gjøre. Det er langt mindre humus i Trollavatnet enn i Langavatnet, noe relativt ferske målinger klart viser. 
  

Til fjells søndag 26. august
Flotte og godt merka turstigar i Vikefjella
(1.9.12 SteinarS)  Det var den siste av dei seks Nutakassane som stod for tur den søndagen. Eg kjenner at kondisen ikkje er som før, men det er greitt å ha konkrete mål for turen.  Lett er det og når turstigane er godt merka og opptrakka, sjølv om det er bratt ein og annan kneik. 

Langs vegen er det sett opp skilt på stader som dei gamle kjende, men som nyare generasjonar ikkje har same forhold til. Ein av desse er Ytre Halvarshauglibekken.  Det er ei bru over denne bekken, og mange stein på botnen.  Tankane kjem på at ein av dei største steinane her ve3d brua sikkert også har eit namn.  Kanskje det er: Ytre Halvarshauglibekkbruasteinen.  Spørst likevel om den ville få plass i Guinness rekordbok.

Løftar eg augo så ser eg Trodlafjell kneisa høgt og bratt over tretoppane.  Ein kan lett bli lurt. Det ser ikkje så høgt ut herfrå.  Men etter kvart som ein klatrar oppover, så går det litt innover og endå meir opp.  Det eg ikkje såg nedanfrå. 

Det tar si tid før eg endeleg er oppe.  Det er fotefar etter grove fjellsko solar på stigen.  Vel framme må eg sjekka i boka - og få mistanken stadfesta. Jo, det er Roald Årvik har vore der før meg i dag.  Må berre bla litt i boka og telja.  Eg har nok ikkje tjangs på nutastaven ser eg.  Det er mange namn, og særleg nokre som går igjen, ofte.  Datoen står der og.  Får vera glad for at eg nådde alle seks i år. 

Utsikt frå Trodlafjell mot Vikevika

Frå Trodlafjell er det fantastisk flott utsikt mot bygda, fjorden og Vikevika. Må sikra meg minna på kameraet.  Det blir mange bilete i året.  Dei fleste ligg trygt lagra på harddisken, eller skal vi seia: Harddiskane.  Prøver å lagra på minst tre ulike harddiskar.  Det einaste som er sikkert med datautstyr, er at det sviktar ein dag.  Levetida på ein harddisk er sjeldan over 5 år.  Då er det slutt, og kostar ei formue å få minna fram att.  Ved heile tida å sikra at bileta ligg på minst tre ulike lagringsmedium, er ein av to ulike måtar å sikra dei for framtida.  Den andre er det gode fotoalbumet.  Det verkar sjølv om straumen går, og virus har eg ikkje høyrt om der.  Berre om mått.  Den kjende litle krabaten på 2-3 mm som eigentleg heiter Stripet Borebille.  Den likar og fotoalbum, om dei ikkje vert trygt lagra.

Den gamle brua ved Djupava  (Va = ein stad dei vada, eller vassa over elva)

Så må eg heimover igjen.  Det går raskare nedover enn opp.  Treng ikkje så mange pustepausar då. Men det tok si tid i år.  Må visst gå oftare.

Les meir her 

Laurdagsklubben
(1.9.12 SteinarS)  Laurdagsklubben på bedehuset starta opp igjen laurdag 1. september. Der får born som er 4 år og oppover koma for til leik, song, aktivitetar og bibelforteljingar. På det meste er det 30 born som finn kjem.  Det er nok eit teikn på at det er kjekt der og at Kjersti Hausberg Bjerga har funne tonen og veit kva borna likar. 

Den første laurdagen var det fullt hus på bedehuset. 

Nå blir det laurdagsklubb desse datoane utover hausten:
15.sept., 29.sept., 13.okt., 27.okt, 10.nov., 24.nov., (kanskje 8.des.).

Alt på søndag 2. sept inviterte ho med seg dei som born og familiar, til Supersøndag på Stemnestaden og Grinde. Her var det full fart med spennande aktivitetar heile dagen, fram til stor konsert klokka 16:00 i Skjoldhallen med Jarle Waldemar.

- Me skal ha laurdagsklubb kvar 14. dag, fortel Kjersti.