Kommunestyre
Eit elektronisk eksperiment

Papir er ut
(3.2.2012 SS)  Ei ny tid er komen til Vindafjord.  Gjennom alle tider har politikarane kome til kommunestyret med tjukke dokumentbunkar under armen. Så var det å halda styr på alle papira og ikkje blanda dei med den ein sat saman med.  Men denne tida er forbi.  Nå kjem politikarane med ei lita, tynn plate.  Brettar av dekselet på framsida og har ein liten skjerm på storleiken med ei vanleg bok.  iPad er det berømte namnet.  Her er alle dokument til møtet, og tilgong til tidlegare saker og planar, kalender (planleggjar).  Internett og e-post.  Ja, facebook og twitter for dei som er komne så langt.  Kopla saman trådlaust med mobiltelefon, kontor pc mm, skal politikarane blir meir fleksible.  Om ein er på reise - så er saksdokumenta like tilgjengelege - på iPad'en. 

For oss som vaks opp med skuleopplæring i "Touch-metoden" og mekanisk skrivemaskin med fargebånd og rettetast, er det ei ekstra utfordring då det ikkje er plass til å praktisere "touch", men må over på to-finger-metoden på grunn av plassen.  Men likevel - prøv og feil metoden fungerer utmerket.  iPad er ei løysing som skal gjera politikarane meir effektive, og samstundes spara kommunen for pengar til trykking og distribusjon av tjukke dokumentbunkar.  I tillegg sparer ein miljøet for tonnevis med papir som skal makulerast. 

Saker som opptek deg
(3.2.2012 SS) Alle politiske møter er opne for allmenta. Unnateke er handsaming av visse saker som t.d. tilsetjingar og slike der ein etter lovverket kan lukka møtet.  Dette skjer svært sjeldan, og slike saker blir lagde til slutten av møta.  Tidlegare var det tradisjon med å flytta kommunestyremøta mellom bygdene, slik at folk lettare skulle kunna koma for å høyra på drøftingane.  Men erfaringane gjennom mange år var at tilhøyrarar - det var det sjeldan ein såg.  Berre når det var store stridstema og liknande.  Av den grunn avgjorde kommunestyret i fjor at kommunestyremøte som hovudregel blir lagde til Ølen Kulturhus (også kalla Samfunnshuset).

Vikebygd på sakskartet
Møte tysdag 7. februar
Så er det kommunestyremøte igjen.  Det første dette året er 7. februar.  I møtet, som tek til klokka 16:30, er det fleire saker som engasjerer folk i bygdene våre.  Innbyggjarinitiativ-saka om plassering av sykkel og gangsti mellom Ølen og Ølensvåg; riving eller sal av gamleskulen i Vikebygd; Endeleg godkjenning av reguleringsplan for bustadfelt Trovåg Nord (sjå kart over området) og andre saker. Mellom anna fleire som gjeld Samhandlingsreforma, samarbeid med Helse Fonna og med nabo kommunane.

Komplett saksliste og alle dokument ligg tilgjengelege for allmenta på web-sida til kommunen.  Du kan lesa sakslista for møtet 7. febr. HER.