Vikestølsmøtet
Fint ver for dei som gjekk turen til Vikestølen

(8.7.2012 SteinarS)  Langtidsvarselet hadde sagt regn denne dagen, men søndagen vakna vi til blå himmel og strålande sommarsol.  Omlag 40 møtte til det årlege Vikestølsmøtet, som i år vart den 8. juli.  Hovudtalar var Sten Sverre Syvertsen som har bakgrunn som offiser i Frelsesarmeen og som misjonær i utanlands-teneste.  Nå arbeider han i sjukepleia, men måtte medgi at lengten etter å reisa ut nå var der, spesielt nå når borna var vaksne.

I talen sin tok han utgangspunkt i Noa.  Han som fekk beskjed frå Gud om å byggje ein stor båt - langt inne på det tørre landet. Han var lydig og gjorde det han fekk beskjed om.  Så skjedde det som Gud hadde planlagt, og Noa og hans folk vart berga fordi han trudde. Slik oppfordra han også oss i dag til å gå når Gud kallar.

I møtet vart også Olav Granberg vald til nytt medlem i styret (for Ølen kyrkjesokn)  Elles set: Hans Asbjørn Åsbø (leiar), Steinar Skartland, Endre Stople og Jørgen Landa i styret for Vikestølsmøtet.
Les meir her frå møtet og fleire bilete.
Tekst til: Song til Vikestølsmøtet 2012.

Steinar Skartland ynskte velkommen til Vikestølen, og leia det første møtet.  Her vart det også halde val på nytt medlem i styret for Vikestølsmøta, Olav Granberg frå Ølen kyrkjesokn, vart vald inn nå.  Det var det Haugianske tankegodset som stod sentralt hjå dei som starta opp med Vikestølsmøta i år 1900, som eit felles stemne for Vikebygd, Skjold, Vats, Ølen og Bjoa kyrkjesokn.  Framleis er dette rådande for styret som steller i stand stemnemøta, nå 112 år etter at det tok til.

Sjølv om dei fleste går til fots opp til Vikestølen, så er det til god hjelp for dei eldste at ein kan tilby skyss med bil på traktorvegen oppover.  I tillegg vart det denne gongen transport av instrument og utstyr som transportane vart nytta til.

Ver velkomne kva og ein
som har gjort den vegen bein
at me samlast kan på Vikestølen saman
Me er i så god ei trend
og me alle saman brenn
Her me finn i lag - ja, her me har det gaman.

Lange tider det har gått
ja, frå fedrar har me fått
Stemnet høgt til fjells der møttest dei så mange
Ifrå Vikebygd min san
og frå Skjold og Vats dei rann
folk frå Bjoa og frå Ølen – dei vart mange

Ja, det vart som hist ein gong
då dei samlast dagen lang
Gallilea var det fjellet der dei møtte
Jesus Kristus der dei fann
han var hyrdingen så sann
Han var meisteren som ingen frå seg støytte

Ein gong alle vanta mat
der dei samla saman sat
Berre vesleguten hadde med seg niste
Og det vesle som han gav
vart til verdens beste rav
alle åt og alle vart av dette mette

Slik me samlast kan i lag
i vår nye store dag
enn me er på fjellet saman med vår Meister
Enn i dag han delar ut
for vårt brot og all vår sut
Ja, til sola sig i havet uti vester

Må me alltid vara vel
det som stadig for oss tel
å få vera saman om det aller beste
Jesus møter alle som
ynskjer høyra dette kom
og på nytt få nya opp sitt gode feste

Ja, frå lekmannen det kom
det som gjer så mange from
det som atter gir oss meir enn me kan fata
Glede stor og kjærleik varm,
det me finn i Herrens barm
Han oss følgjer Han vil ingen her forlata

Dette er vår store arv
og det tryggjer all vår tarv
Ja, det skjermar oss frå verdas ville vegar
Må me heisa flagget reint
og i livet her gå beint
Då me veit at Jesus med oss alle stegar

Halleluja – høyr vår sang
la han tona over vang
la oss syngja – la oss saman lyfta arven
som gir alle same rett
til å velja – alt blir lett
og me stør kvarandre i den gode tarven.

Og frå Vikestølen fer
der me alle saman ber
der me får igjen det beste av det beste
takk for gode syskinlag
me går atter over stag
og får sinnelaget godt - det beste feste.

JL 03.05.2012