Siste dag for gamleskulen

(Steinar S 29.3.2012)  Torsdag 29. mars kunne Jens Morten Koltveit setja grabben i skuleveggen og starta rivinga.  Det heile var unnagjort på nokre få timar. Så låg alt i ei røys og brauten kunne triumfera oppå restane av det store bygget.  Mange har vandra inn og ut av dørene her gjennom seks eller ti år av sitt liv.  Nå er denne tida historie og snart er tomta planert.  Dei fleste av spora etter mine første seks skuleår er borte.  Att har me minner, gode og mindre gode.  Oppe på haugen triumferer nye-skulen.  Den er alt vorten for liten.  Treng utviding for at dei hundre borna i skule og barnehage skal få plass til å sanka kunnskap for livet.  Plass til aktivitetar og leik.   

Det nå står att er å transportere materialane til Toraneset, fylla i  den gamle byggjegropa og planera overflata.  Etter påske, ein gong.  Så er den gamle skuleplassen gjort ferdig for ny leik og moro.  Og i kassane til laga som deltok kling myntane inn.  Oppgjer for det medlemane deltok i på dugnad. 
Sjå her frå rivearbeidet.

Fotoalbum frå ringa ser du HER

Gamleskulen 27. mars
Skorsteinen gjekk i bakken

Dugnadsgjengen var i full aktivitet tysdag kveld. 
Kjetil Skartland hadde tau frå skorsteinen, festa i traktoren.  Det var over på nokre sekund mens mursteinen spratt utover asfalten.

Leif Jørgensen var svært nøgd med oppslutninga av dugnadsfolk.  Nå er all skiferen komen av taket og stilasa er demonterte. Torsdag skal Koltveit jamna bygget med jorda ved hjelp av gravemaskina.  Han reknar med at det skal vera gjort i løpet av dagen, seier Jørgensen.  Bortkøyring til Toraneset vil først skje etter påske. 

Slutten på gamleskulen i Vikebygd
Lions Club i spissen for 7 lag riv bygget

(24.3.2012 Steinar S)  Laurdag 24. mars var det stor aktivitet med riving av gamle-skulen.  Fleire erfarne byggmeistrar stod i spissen for ivrige dugnadsfolk. Lion's Club har inngått avtale med kommunen om rivinga og samarbeidar med 6 lag i bygda om dugnad. 

Opphavleg hadde dei planar om å brenna bygningsrestane.  Dette vart det ikkje gjeve løyve til og avtalen måtte refor-handlast slik at alt vert køyrd til deponi på Toraneset. 
-Kommunen tek avgiftene der, men klubben må dekka leigetransport og maskinar for riving, planering og fyllmasse til byggegropa, fortel Leif Jørgensen.  Dermed blir det restbeløpet som laga kan dela omlag 100.000 kroner.

Stillaser vart rigga langs bygget og skiferheller vart langa frå mann til mann for så å verta stabla på pallar på bakken.  Geir Vårvik var i full gong med å demontere vindauger.  Andre bar ut restar av utstyr frå bygget.  Mykje av dette vart køyrd til Toraneset avfalls-anlegg, men her var og mange frå bygda og henta med seg heim ting dei kunne nytta. 
- Skiferhellene skal vi selja fortel Jørgensen

Lion's har nå 13 medlemmer i Vikebygd og Skjold.  Denne helga var dei aktive både med riving av gamleskulen og med dugnad på ei hytte i Långåsdalen. 

- Midlane vi får inn vert bruka til gode og nyttige formål i bygdene her, fortel Jørgensen som var klubben sin representant ved gamleskulen.  - Vi brukar ingen ting av dette på oss sjølve.  Denne gongen er det fleire lokale lag som får dele overskottet frå dugnaden.  Desse er:
 

Vikebygd Båtforrening, Vikebygd Grendalag, FAU, Vikebygd Idrettslag, Vikebuen, KFUK-KFUM Speidarane og Lions.  I tillegg til Lions sine dugnadsfolk skulle desse andre laga stille med totalt 22 personar i dugnadsgjengen.  Når heller og vindauger er fjerna skal Kolltveit riva resten av bygget med gravemaskin.  Deretter skal alt transporterast til Toraneset.

For dei med sans for gamle ting så var det mange skattar å finna i det gamle skule-bygget.  Hanne Jorunn og Hilde fann juletrelys som dei meinte ville vera ideelle for Rolf på butikken.