Vikestølsmarsjen 4. september 2011

 
Vikestølsmarsjen 2011
Godt med folk i fjellet trass i gråvêret.
    
(4.9.11 SteinarS)  Idrettslaga i Bjoa og Vikebygd inviterte til Vikestølsmars søndag 4. september.  Det har vorte ein tradisjon gjennom mange år at første søndag i haustmånaden er tilstelling her på  Vikestølen.  Det kom mange i år også, men ingen gjorde nøyaktig oppteljing.  - Er nok litt mindre enn i fjor, -for då var det flott vêr, kunne komitémedlemane konkludere med. Underteikna anslår deltakinga til omlag 120-150 personar.

Dei som registrerte seg og betalte ein kontingent på 30 kroner, fekk diplom.  I år var motivet på denne teikna av Solvor Vee Sandsgård frå Bjoa. 

Det var som vanleg konkur-ranse i hesteskokasting og kafé med sal av lapskaus, pølser, kaker og kaffi. 

 
Litt yr i lufta, men stort sett opphaldsvêr var ikkje noko som heldt folket heime.  Dei kom frå både Bjoa og Vikebygd.  Midt på dagen, omlag klokka 13:30, slo det om på kraftig regn ein times tid.  Då var  det godt å kunna setja seg tett inne i hytta der det var fyr på peisomnen og god stemning.  Folket metta set med kaker og lapskaus, eller medboren niste.

I halv tre tida var det trekning av loddsalet og gevinstane fordelte.  Mange var alt gått ned igjen så det vart naboar og kjende som måtte få med seg gevinstane heimover.  Tilslutt var det rekning av ryggsekk mellom dei som i det siste året hadde skreve seg inn i loddboka i hytta.  Roald Årvik vart trekt ut. Han er ein av dei som er flittig gjest både i hytta og i fjellheimen her mellom Bjoa, Vik og Vats.  Så letta uveret - og folket kunne gje seg på heimtur.  Nokre til hest nedover skogsvegen mot Eikås.