(20.8.2012  SS)  12 førsteklassingar møtte til sin første skuledag i Vikebygd torsdag 16. august.  Skulen har nå eit rekordstort elevtal.  heile 69 born skal gå på Vik Skule i år.  Første og andre klasse deler klasserom, og til saman er dei 20 elevar.  Det blir litt trangt med så mange elevar på skulen, som for nokre få år sidan var nede i 42 elevar.  Men borna som tek til på skulen kjenner kvarandre frå før.  Dei har vore saman i barnehagen, som vert driven i lag med skulen.

I vår reiv dugnadsfolk den gamle skulen og nå er det berre dei nyaste bygga som er i bruk.  Det gjev ein del utfordringar når ein ikkje har lagerrom og sløydsal.  Også barnehagen har meir born enn då han vart bygd.  På kommunen sine planar står at skulen skal få tilbygg.  Dette er noko som bør planleggjast og koma i gong om ikkje alt for lengje, med så stort barnetal som bygga nå skal huse.

Med 19 nye byggjemodna tomter like i nærleiken av skule og barnehage, og med stor ny leikeplass, så skulle alt liggja vel tilrette for at fleire vel å flytta til bygda, og kanhende skriva inn born i skule og barnehage? 

Les også artikkelen frå hausten 2010: 100 barn i skule og barnehage.