Romjulsminner

Tradisjonell julefeiring
Juletrefest på bedehuset
(29.12.2010 SteinarS)  Laurdagsklubben invi-terte til ein tradisjonell juletrefest i romjula. 57 store og små møtte opp og fekk med seg julesongar, andakt, leiker, utlodning og sjølvsagt juletregang. Dette er eigentleg mindre enn 10% av folket i bygda (då det også var nokre tilreisande). Flott frammøte der folk koste seg. Fekk med seg julebodskapen i Kjersti Hausberg Bjerga sin andakt og i julesongane.

Men dette er einaste juletrefesten i år i Vikebygd.  Ein tradisjon vert halden i hevd, men for det store fleirtalet er juletrefest på bedehuset ikkje lengre ein del av juletradisjonen. 

På juletrefesten måtte det til aktivitetar som får alle engasjerte. Kjersti las opp ei verselinje frå ein julesong. Kvart bord skulle gjetta kva song det var, for så å reisa seg og syngja denne julesongen. Ein konkurranse som skapte stort engasjement frå alle. fire av jentene våga seg med på ein leik der det var om å gjera å eta i seg ein sytråd for å få tak i ein seigmann i enden av tråden.  Ikkje lett - men mange heiarop frå dei andre på festen ga inspirasjon til innsats.
Til toppen

Det kimar nå til Julefest.
(30.12.2010 SteinarS)  Julaftan klokka 16 er det ein flott tradisjon i Vikebygd at då møter folk til gudsteneste i kyrkja.  Denne familiegudstenesta varer berre 45-50 minutt og sluttar med 3 x 3 slag på den vesle kyrkjeklokka. Så er det ein kort pause før jula skal ringast inn klokka 17:00. 

På julaftan kimar klokkene.
I gjennom mange år nå har medlemar av familien Tveit stått for den spesielle "kiminga" med kyrkjeklokkene klokka 17:00.  Det var det også i år, med Andreas Tveit og bestefar Ness, ein erfaren kyrkjetenar frå Skånevik.  Under kiminga deltek to ringarar med kvar si klokke. Først så slår ein sakte med vekselvis liten og stor klokke. Så aukar farten gradvis oppover til veldig rask kiming, før ein går over til å ringa på vanleg vis med begge klokkene. Deretter ein liten pause før ein startar opp igjen på ny runde.  Etter tradisjonen skulle denne kiminga ha halde fram i ein heil time, men i Vikebygd har vi korta dette ned til 15-20 minutt.
(Reglar for bruk av kyrkjeklokker).

Når lukene er opne i kyrkjetårnet så kan ein stor del av bygda høyra lyden av dei, som når heilt til Skartland.  Som liten stod vi borna ute på trappa heime og lydde etter lyden av kyrkjeklokkene som ringde jula inn. Det er det ennå ein og annan som tek seg tid til, for klokkene ringjer etter at ein er komen heim frå kyrkja. Så starta julehelga. 

Årsaka kan vi berre spekulera på, men ein sokneprest som har syn for å inkludera mange i gudstenesta, er nok en av grunnane. Det har vorte ein flott tradisjon at musikk-korpset spelar både åleine og saman med kyrkjeorgelet. Også i år fekk vi gle oss over desse flinke musikkarane vi har i bygda. Helge Veastad på gitar i samspel med Arne Tveit på orgel, er eit anna flott innslag som vi får gle oss over. Begge er dyktige musikkarar, som har anna arbeid som hovudinntekt, men som også stiller opp med musikken når dei vert bedne om det.

At sikringen vart sprengd i SØK sin transformator var nok ikkje musikken si skuld - men kanskje heller at ein svært kald julekveld førte til at mange hadde sett på full styrke på varmen før dei gjekk til kyrkja. Så skal SØK ha ros for at dei var raskt på plassen og fekk ordna feilen. Dessverre fekk vi høyra litt mindre enn planlagt av Helge sin gitar, men det vonar vi at det kjem nye høve til. Eg kan berre retta ein stor takk til alle i Vikebygd som stiller opp både som deltakarar og tilhøyrarar når noko skal arrangerast.   Til toppen

Mildt gråvêr og lågt skydekke ved inngang til 2011
(31.12.2010 SteinarS)  Som sagt.... Dersom isen på Skartlandsvatnet (eller Vasslivatnet..) ber hest og mann føre jul, så blir det mildvêr etter nyttår.  Ja, isen bar godt i adventstida, men nå er det + 3-5 grader og regn i lufta.  Fekk mest lyst tl å senda ut ein etterlysing.  Har nokon sett Alna-åsen i dag, eller vikefjella?

Eg vil med dette ynskja alle Vikebuar eit GODT NYTT ÅR