Vikebygd kyrkje

Konfirmantar og jubilantar.

(19.9.10 Steinar)  Søndag 19. september var det familiegudsteneste i Vikebygd, der konfirmantane våren 2011 vart presenterte for kyrkjelyden. 

Britt Nelly Ness Tveit og Johannes Nedrelid under seremonien med utdeling av konfirmantbibelen til 6 av dei 7 som skal konfirmerast våren 2011.

50 års jubileum
50 års jubilantane for konfirmasjonen var også inviterte til kyrkja for å markera jubileet. Av desse kunne berre 3 møta av ei gruppe som opphavlege talde 12. Heile fire var gått bort av denne gruppa. 

Johannes Nedrelid intervjuar jubilantane:
Anne Lise (Erdal) Auestad; Else Karin (Egge) Amundsen og Sigrid Helene (Svendsbøe) Leifsen.

Rett etter gudstenesta vart alle inviterte på kyrkjekaffi bak i kyrkja.  trass i flott sol ute så valde dei fleste å stansa igjen til ein kopp kaffi og gode kaker, også dette laga på dugnad.

Kyrkja meir tilgjengeleg for handikappa.

(19.9.2010 Steinar S.)  Vi har ei flott kyrkje, men bygd i ei tid då det ikkje vart lagd mykje resursar på bordet for å leggja tilrette for handikappa. Soknerådet har arbeida med ulike løysingar, og kunne i gudstenesta den 19. september ta i bruk ein ny skrå platting som gjer det mogeleg å koma heilt opp til altarringen, også for rullestolbrukarar.

Det er Arne Tveit og Berge Thomas Velde som har teke jobben med å byggja denne, og Jens Tveit som har blanda maling for å få den så nær dei opphavlege fargane i kyrkja som mogeleg.

Plattinga er ikkje fastmontert, men bygd som ei midlertidig løysing som lett kan fjernast og setjast tilbake.  For å få plass var det naudsynleg å ta ut fremste benken.

Frå tidlegare er det laga innkøyring for rullestol ved den austre inngangen til kyrkjeskipet.  Også denne er definert som "midlertidig" og det vert arbeida med planar om å få til rullestolinngang ved den sør-vestre inngangsdøra, som ikkje vert brukt i dag. Kyrkja har heller ikkje toalett tilrettelagt for handikappa, noko som det kom pålegg om tidleg på 90-talet. Klokkar og soknerådsleiar Britt Nelly Ness Tveit takka dei som hadde gjort dugnad og informerte om kyrkja sine oppussingsplanar før jubileet i 2012. 
- I tillegg til midlar frå kommunen vil det nok vera trong både for dugnad og innsamling av midlar, sa ho.

Prostidag i Vikedal:
Sokneråda møtte biskopen
(21.9.10 SteinarS)  Alle sokneråda i Nordre Ryfylke
prosti møttest i Vikedal for å snakka om Gudstenesta som stad for fellesskap og fornying.

Fire soknerådsmedlemar frå Vikebygd deltok på møtet og fekk høyra ein inspirerande og gripande tale av Biskop Erling J. Pettersen. Med utgangspunkt i uttrykket: "I Kristus - nær livet" skifta den tidlegare misjonæren mellom å tala om ny gudstenesteliturgi, fortelja gripande minne frå ei lang presteteneste, syngja og spela gitar til. Etter ei matøkt vart alle sokneråda inviterte til å koma med innspel og tankar om dette temaet.  Martin Ivar oppfordra sokneråda til å våga å dela draumane og visjonane sine med kvarandre, og biskopen følgde opp med sei at:
- Når ein drøymer, blir det berre ein draum.  Når to eller tre drøymer saman blir draumen til verkelegheit.

Utfordringa for kyrkjelydane er å klara å engasjera fleire frå bygda.  Få fornya seg både innan liturgi, salmeval, språk og å både trekkja inn kvardagsliv og stillhet i gudstenesta.

Kateket Britt Karstensen greip også ordet og inviterte alle i vikebygd til ei Sprell Levande Gudsteneste klokka 11:00 på søndag 3. oktober.  Ei gudsteneste med barn og mykje liv.

Les om kyrkjelydane i Vindafjord, HER.