Julegudstenesta i Vikebygd 2010

Julefeiring 24.desember 2010
Straumbrot hindra ikkje gudstenesta i Vikebygd
(24.12.2010)  Ei flott julegudsteneste sjølv om straumen delvis vart borte i denne delen av bygda. Både elektrikar og SØK rykka ut for å ordna opp.

Gudstenesta på juleafta er alltid godt besøkt i Vikebygd.  I år var 232 festkledde samla i kyrkjerommet og vart møtt med preludium av Helge Veastad (gitar) og Arne Tveit (kyrkjeorgel) i samspel.  Men brått skjedde det noko og den vakre musikken vart blanda med buldring både i høgtalarane og oppe frå tårnet. Noko var skjedd med straumen og kontaktorane i sikringsskapet dura kraftig.  Dette ga seg då sikringane for styrestraumen til varmen vart kopla ut. Sokneprest Johannes Nedrelid valde å halda fram med gudstenesta, men utan høgtalarar og med halv styrke på ljosa.  Om lyset var svakare enn elles så såg folket songarka og stemde i på dei kjende julesongane  Musikkorpset var med også i denne gudstenesta.  Saman med orgelet spela dei til songane og framførte også to eigne nummer: "Julenatt" og "Himlen i min favn". 

Soknerådet fekk purra ut elektrikar Per Øyvind Birkeland i hu og hast.  Han konstaterte at ein av dei tre fasane inn til kyrkja var falle ut.  Til alt hell var orgelet ikkje på den fasen.  Han kontakta Skånevik - Ølen Kraftlag sin vakt telefon.  Her var feilen alt oppdaga og reparatør Vidar Hjelmeland var på veg.  Han nådde fram til kyrkja samstundes som folk sette seg i bilane for å dra heim til julemiddag og pakkar.  Så for Per Øyvind var det berre å pakka saman og dra heim igjen.  Det var likevel flott at han stilte villig opp då han vart purra på sjølvaste julekvelden.

Vidar Hjelmeland skal ha vakt for SØK i heile juleveka.
- Dette var første utrykking i julehelga, kunne han fortelja, men la til at han vonar det ikkje blir for mange feil.  Likevel, beredskapen er på plass og skal sikra at folk i bygdene her har straum i den kalde julekvelden.

Vi ynskjer alle ei God Jul og fredfull høgtid i denne siste veka av året 2010. 

Det kimar nå til Julefest.
(30.12.2010 SteinarS)  Julaftan klokka 16 er det ein flott tradisjon i Vikebygd at då møter folk til gudsteneste i kyrkja.  Denne familiegudstenesta varer berre 45-50 minutt og sluttar med 3 x 3 slag på den vesle kyrkjeklokka. Så er det ein kort pause før jula skal ringast inn klokka 17:00. 

På julaftan kimar klokkene.
I gjennom mange år nå har medlemar av familien Tveit stått for den spesielle "kiminga" med kyrkjeklokkene klokka 17:00.  Det var det også i år, med Andreas Tveit og bestefar Ness, ein erfaren kyrkjetenar frå Skånevik.  Under kiminga deltek to ringarar med kvar si klokke. Først så slår ein sakte med vekselvis liten og stor klokke. Så aukar farten gradvis oppover til veldig rask kiming, før ein går over til å ringa på vanleg vis med begge klokkene. Deretter ein liten pause før ein startar opp igjen på ny runde.  Etter tradisjonen skulle denne kiminga ha halde fram i ein heil time, men i Vikebygd har vi korta dette ned til 15-20 minutt.
(Reglar for bruk av kyrkjeklokker).

Når lukene er opne i kyrkjetårnet så kan ein stor del av bygda høyra lyden av dei, som når heilt til Skartland.  Som liten stod vi borna ute på trappa heime og lydde etter lyden av kyrkjeklokkene som ringde jula inn. Det er det ennå ein og annan som tek seg tid til, for klokkene ringjer etter at ein er komen heim frå kyrkja. Så starta julehelga. 

Årsaka kan vi berre spekulera på, men ein sokneprest som har syn for å inkludera mange i gudstenesta, er nok en av grunnane. Det har vorte ein flott tradisjon at musikk-korpset spelar både åleine og saman med kyrkjeorgelet. Også i år fekk vi gle oss over desse flinke musikkarane vi har i bygda. Helge Veastad på gitar i samspel med Arne Tveit på orgel, er eit anna flott innslag som vi får gle oss over. Begge er dyktige musikkarar, som har anna arbeid som hovudinntekt, men som også stiller opp med musikken når dei vert bedne om det.

At sikringen vart sprengd i SØK sin transformator var nok ikkje musikken si skuld - men kanskje heller at ein svært kald julekveld førte til at mange hadde sett på full styrke på varmen før dei gjekk til kyrkja. Så skal SØK ha ros for at dei var raskt på plassen og fekk ordna feilen. Dessverre fekk vi høyra litt mindre enn planlagt av Helge sin gitar, men det vonar vi at det kjem nye høve til. Eg kan berre retta ein stor takk til alle i Vikebygd som stiller opp både som deltakarar og tilhøyrarar når noko skal arrangerast.  
Les meir HER