(10.6.2012)  Liv og Thomas Bakkevig har oppretta to fond, der det eine skal yta midlar til støtte for barne- og ungdomsarbeid i Vikebygd.  I styret for dette fondet sit Øyvind Valen (leiar), Arne Tveit og Eva Bakkevig. 

Begge fonda er organiserte som stiftingar.
Fondet til støtte for barne- og ungdomsarbeidet er nyoppretta av Thomas og Liv Bakkevig i 2012 og skal ha sin fyrste utdeling hausten 2012, fortel Øyvind Valen som leier stiftelsesstyret. Det kan årleg delast ut midlar til fylgjande 3 område:

• Støtte til drift for etablerte lag og organisasjonar som driv arbeid
  for aldersgruppa 7-19 år i Vikebygd.

• Støtte til investeringar til etablerte lag og organisasjonar som
  driv arbeid for aldersgruppa 7-19 år i Vikebygd.

• Støtte til personar eller grupper som vil starta nytt arbeid
  for barn og unge i Vikebygd.

Søknad vert å senda til Liv og Thomas Bakkevigs fond for støtte til barne og ungdoms-arbeid i Vikebygd, ved leiar i stiftelsesstyret Øyvind Valen, Trovåg, 5568 Vikebygd innan 1. september.

Last ned informasjonsark om fondet her.

"Stiftelsen Liv og Thomas Bakkevigs Fond for Støtte Til
Vedlikehold og Reparasjon Av Vikebygd Kirke"
Det andre fondet er til støtte for vedlikehald av kyrkja i Vikebygd.  Styreleiar i dette fondet er Brit Nelly Ness Tveit, som har med seg styremedlemmene: Anita Øvstedal og Øyvind Valen.  Soknerådet skal prioritere og søke om midlar frå fondet, som vil tildele eit beløp årleg.  Ikkje som avkastning, men inntil fondet er brukt opp, fortel Brit Nelly.  Det er ikkje meininga at dette skal gå til erstatning for vanlege driftsutgifter eller kostnadar som ligg under kommunen og fellesrådet, men til ekstraordinære tiltak som kjem kyrkja og bygda tilgode.

I 2011 og 2012 har det vore utført omfattande vedlikehaldsarbeid på dette kyrkjebygget, som på mange måtar er unikt.  Sjølv om bygget er frå 1937 og har 75 års jubileum i år, så er bygget verna av Riksantikvaren, noko som sjeldan vert gjort på så unge bygg.  Men Vikebygd kyrkje, den 5. på denne kyrkjestaden gjennom 800 år, er bygd i engelsk holmur.  Uvanleg på våre kantar der dei fleste kyrkjene er av treverk. Det står ennå att ein del arbeid på kyrkja, og og mykje vil vera på plass fram mot jubileet i september.

(14.11.2012 Ø.Valen) Fyrste utdeling frå Liv og Thomas Bakkevigs stifting til støtte for barne- og ungdoms-arbeid i Vikebygd er no utført. Stiftinga har delt ut 218.000 kroner til dei fire organisasjonane som i dag driv arbeid for barn og unge i bygda. Hovudkriteriet har vore talet på betalande medlemmer i alderen 8 - 19 år, i tillegg til investeringsprosjekt. Behaldning og utgifter førre år har justert nokre av tildelingane.

Idrettslaget har fått noko over halvparten av midla, og ein stor del av desse er til ein investering laget har planar om. I tillegg til idrettslaget har speidargruppa, korpset og laurdagsklubben fått gode bidrag til drifta.

Styret i stiftinga, kor Eva Bakkevig representerer givarfamilien, håpar at midla kan bidra til å gi betre økonomi i laga, slik at leiarane kan få bruke arbeidskrafta til å skapa gode tilbod til barn og unge.

Kapitalen som givarane har stilt til rådvelde er 3 millionar, og vedtektene er slik at det kan delast ut inntil 300.000 kroner i året. Hovudtildeling vil skje ein gong årleg, men styret har halde av eit beløp som kan delast ut til grupper/personar som vil starta nye tilbod til barn eller unge i bygda.