|
Feiring i Vikebygd
Folkefest med musikalske perler
 (17.5.2010 Steinar) Ein må bøya seg i støvet for dei mange dyktige musikarar, songarar og humoristar som bygda Vikebygd er velsigna
 med. Folkefesten på nasjonaldagen plar vera bra arrangert til vanleg. I år overgjekk bygdefolket seg sjølv. Den eine dyktige ungdomen etter den andre entra scenen, framførte song og musikk som
fekk den mest fullsette salen til å bryta ut i  stormapplaus. Den framifrå gode programleiaren, Sissel Tunestveit, delte rundhanda ut sjokolade til dei som hadde innslag på scenen.
Astrid Mortveit, Vegard Skartland og Sunneva Tveit er tre unge som imponerer med fantastiske stemmer og kjenslefull tolking av tonar og songtekstar. Fire ungdomar stilte opp med danseinnslag.
 Musikkorpset var som vanleg med. Ein kombinasjon av unge talent og erfarne musikarar under leiing  av dirigenten Andreas Ulveraker. Han under-streka at korpset var lei av
marsjar etter ein lang nasjonaldag med tog, og nå ville korpset visa litt av breidda i det dei til vanleg øver på. Underhaldningsmusikk, jazz og hymnar er mellom eit breitt repertoar. Vi fekk m.fl. høyra "Five o'clock in the afternoon", og "Quatermix". I sistnemnde skulle dei sjølvsagt hatt med Einar Marius på trombone, men hadde gløymt at han var russ og oppteken med andre ablegøyer enn bygdafest og korps denne
dagen. Dei greidde seg l ikevel godt gjennom repertoaret, noko publikum sin applaus var eit godt teikn på. Men du hendelsesløysa, der kom det
opp fem staute karar som hadde sans for musikk og evne til å laga den sjølv også. Frontfiguren og vokalisten, Jone Bjerga, levde seg inn i den eine  sjølvskrevne teksten etter den andre, og
av og til fekk han tid til å bruka gitaren også. Med seg hadde han Helge Veastad på elgitar (bonde og musikar gjennom mange år), Ole Petter Bjerga (bassgitar), Per Øyvind Birkeland (trommer) og Arne Tveit (som glatt skiftar kyrkjeorgelet ut med elpiano og keyboard). Eit knippe musikarar av høg kvalitet som veit å få føtene i salen til å trampa takten (noko ein godt kjende i golvplankane). Dei gamle tok ut
høyreapparatet mens dei unge under sytti jubla.
 Festtalar med erfaringar frå heile verda
Ein nasjonalfest har sjølvsagt festtalar som fast innslag. Rune Birkeland, tidlegare lærar og skulestyrar i Vikebygd, har i gjennom dei siste 25 åra vore sjømannsprest, både i Nordsjøen, på Gran Canaria, og nå som norsk prest for Kina, Japan og Austen. Han fortalde utan korkje manuskript eller talarstol frå reisene
sine og opplevingar rundt om i verda, m.a. i Aserbajdsjan, der han har vore mykje. Rune ga oss ei grundig historielekse om Napoleon, svenskekongen og Danmark. Korleis Noreg fekk si grunnlov, endå vi var i union med Sverige. "-Det er viktig å ha ei ytre, skriven lov, men dersom ein har ei anna lov i hjarta enn på papiret, vert resultatet ofte urettferd og forfylging. Han minna også om Nelson
Mandela, som trass i å vera i fengsel, fekk oppleva at to av fangevaktarane hadde ei betre lov i hjarta sitt enn den dei var pålagde å etterleva i tenesta. Dei nytta denne til å gjera godt og vart heidra for dette då Mandela seinare vart vald til president.
"-Ta vare på den flotte
kristen-humanistiske kulturen vi har fått i arv," var hans oppfordring i avslutninga av ein tale der både born og vaksne sat musestille og lydde. Så må underteikna audmjuk få takka for blomar og gode ord under avslutninga av arrangementet. Bilete frå folkefesten ser du HER.
Bilete frå dagen kan sjåast HER. |
|
Feiring i Vikebygd
17. mai fest, slik ein plar gjera det i Vikebygd
 (17.5.2010 Steinar) Det vart ein flott dag i Vikebygd. Frå Roald Årvik & Co heiste flagget på Trodlanibba, og vidare med flaggheising i parken ved speidarane og korpset; gudsteneste i kyrkja med over
160 deltakarar; folketog med flaggborg, korpsmusikk, skuleborn og barnehage russ og blide fjes. Så heldt det fram med leiker og kafé for store og små på bygdahuset før dagen førebels slutta av i tre-tida med utdeling av premiar og ros til det fantasiske korpset vårt. Gunn Vikingstad oppfordra alle som kunne, eller hadde kunna, spela eit korpsinstrument om å
 melda seg. Dei treng fleire og til fornying, sa ho, sjølv om vi ikkje ville ha vore utan nokon av dei. Flott jobba!! og takk til stor og små som har vore med gjennom dagen på deltaking og dugnad.
Så går det mot kveld og folkefest på bygdahuset klokka 19:00. Tradisjonen tru i Vikebygd, og med Rune Birkeland som talar.
Bilete frå dagen kan sjåast HER. |
|
Dugnadsbygda Vikebygd
Kyrkjegarden og parken fekk finpussen før 17. mai
(11.5.2010 Steinar)
Tysdagskvelden samlast ein flott gjeng ved kyrkja for å for la uteområda der få vårpussen. Singelgangane vart reinska for ugras og mose. Liknande overhaling fekk blomebedet før Brit Nelly Ness Tveit planta nye fine blomar.
Fleire andre møtte og opp med hagerei-skapane sine, 12-14 var det vist på det meste. Litt utrygge på veret var dei nok då det heile dagen var skikkeleg vadlasletta. Sludd, regn, hagl og vind. Men like før dugnaden tok til klokka 18:00 så forsvann skyene og sola skein. Slik var det heilt til det var tid for kaffi og kaker. Då fløymde det ner igjen, så
dugnadsmåltidet måtte ein ta inne i våpenhuset. Kombinert med latter og prat om laust og fast både frå nåtida og med minner frå smågutane som lurte seg til å sjå på slaktinga av sauer for snart eit halvt århundre sidan.
Mykje har endra seg si den tid, men dugnadsånda vert halden ved like i Vikebygd den dag i dag. |
Arne Tveit og Rolf Alne i ferd med
å beskjera gamle tre i parken.
Kolbein Sund og Geir Vårvik gjorde dei siste restane av det nedbrekte treet om til flis før Dag Nagel-Alne og underteikna fekk lødd opp igjen noko av muren som var rasa ned. Sjølve treet har fleire delt på å fjerna, og skal nok varma eit par heimar til vinteren. |
17. mai programmet 
