Det 110. stemnet på Vikestølen

Vikestølen
Mange ville til Vikestølen på friluftsmøte
(4.7.2010 SS)  Det tradisjonsrike stemnet på Vikestølen samla 60 deltakarar søndag 4. juli. Sola vermde så godt at det første møtet vart ute.  Likevel auka vinden så på at ettermiddagsmøtet vart flytta innandørs med litt færre deltakarar enn første møtet.  Teksten for dagen var frå Matteus ev. om Jesus som spurde: Kven seier folk at eg er? Peter sitt svar kom utan tvil:  Du er Messias, den levande Guds son. Og han fekk tilbakemeldinga frå Jesus: "Du er Peter, på denne klippe vil eg byggja mi kyrkja." Fokuset for dagen var på at den som byggjer livet sitt på denne vedkjenninga har gjort det rette valet for livet sitt og skal få reknast med i Guds kyrkja, med eit fundament som held.  Gud treng medarbeidarar som har teke i mot han i hjarta sitt.

Møtet er eit fellesarrangement for bygdene Vats, Skjold, Vikebygd, Bjoa og Ølen/Ølensvåg, men her var også deltakarar frå Haugesund og andre bygder rundt om kring.

Dei aller fleste gjekk til fots opp til stølen, men for veteranarane var det godt med ein bil som kunne frakta dei opp dei bratte bakkane.

Og veteranar var her mange av.  Den eldste var nok Magnus Sørhus, som med sine 97 år har vore fleire turar til stølen enn andre. Han var i godt selskap med m.a. Karl Granberg, Sven Årvik, Endre Heggen og Gudmund Skartland.  Men her var også mange som var mykje yngre og som gjev tru på Vikestølsmøter i mange år frametter.  Sjølv gjekk eg vegen opp frå Vikebygd og måtte ta godt i for å nå igjen to kvinner føre meg på vegen.  Eg såg det var vante turgåarar, men vart overraska då den eldste fortalde ho var over 80 år.  Ja, då er oppfordringa til alle andre i bygda.  Kom deg til fjells.  Då held du deg sprek og lever lenge. Og skulle du vera allergisk mot pollen, så kan du kanskje heller kasta deg med på Sommartango i august, eller ein trimsykkel hos Rolfen?