|
Grendautvalet
Rådmann møtte grendautval og
lokalpolitikarar
 (12.4.10) Leiar i Grendautvalet, Rune Hetland, poengterte at her i Vikebygd har
vi fokus på det positive. Vi vil ikkje nytta møta i grendautvalet til å
fokusera på negative forhold med berre å kjempa mot nedleggingar, men fokusera
på kva vi kan få til her i bygda. Gjennom denne fokus skaper ein tru på
framtida og folk får lyst til å slå seg ned her. Rådmann Birkeland rosa
bygdene i Vindafjord for å ta initiativ og få i gong ting sjølve. dette er
unikt med bygdene her.
Likevel fekk rådmannen fleire spørsmål om den saka som har engasjert
mange i det siste: Fiskeoppdrett ved Buholmen. Reidar Bjordal la vekt på at
dette er eit relativt lite oppdrettsanlegg samanlikna med mange andre.
Rådmann Kristian Birkeland viste til at konsesjonen var gjeven frå statleg hald.
Han såg ingen grunn til å driva klappjakt på lovleg verksemd, men det er viktig
å sikra at krav til etableringa vert fylgde.
Grendautvalet var særleg
interessert i kva ein kan gjera for å få industri til Dommarsnes. Betre
veg og marknadsføring frå kommunen si side er viktig, men vi har ei utfordring,
peika Birkeland på. Det er ikkje vatn nok til industri på Dommarsnes. Her
må det arbeidast fram gode løysingar. Kjem næring som krev ein del vatn så
vil ikkje reinsa drikkevatn vera det rette, og kapasiteten gjennom
røyrleidningane er for liten slik det er i dag. Grendautval og rådmann var
samde om at har måtte det la seg gjera å arbeida fram gode løysingar og ikkje la
dette hindra etableringar. På Dommersnes er allereie 30 arbeidsplassar,
poengterte Rune Hetland. Industrifeltet har ikkje dei store etableringane, men
mange levedyktige små verksemder. Dette gir kan hende også minst konfliktar med
hytter og fast busetnad.
Vikebygd skiljer seg ut frå
andre bygder med at ein har eit samla sentrum. Men bygda manglar
byggjeklare tomter. Difor har det vore fleire som har vendt ryggen til
bygda og busett seg andre stader. Rådmann og Grendautval var samde om at
dette var eit prioritert område for at bygda ikkje skal oppleva stagnasjon.
Utfordringa er å selja fleire tomter slik at ein kan starta opparbeiding av
regulert areal i sentrum av bygda. Arealplanen syner område som er sett av
til nye bustader, men med ein søkjar på tomt er det ikkje nok til å starta
arbeidet. Marknadsføring må til frå kommunen si side for å få fleire
interesserte kjøparar. Rådmannen skal i tida frametter vitja alle
Grendautvala og ville også kalla alle saman til fellesmøte med idemyldring. Det
er klart tru på framtida både i Vikebygd og dei andre bygdene. |
