100 år er gått
Årvik Skule 1912

Lærar Dahle og Lærarinne Betha Aarvik saman med elevane utanfor skulebygget i Årvik 1912
Kanskje nokon har namna på dei?  Så langt kjenner vi igjen:  Samson Skartland (2 i bakre rekke)
Knut Johnsen Skartland og Valborg Skartland (midt i 2. bakarste rekke).
Selmer Tindeland  og Gudmund K. Tindeland (ved Dahle), Alfred Skartland (midt i fremste rekke)
Gurine og Elisabeth (Stien) Skartland (med blondekragar ytst til høgre i 2, rekke)
Kanskje er det Hjørdis Skartland og Inga Årvik heilt til høgre i midtarste rekke.  

Foreining starta
Vil ta vare på den gamle skulen i Årvik

(1.11.2012) Torsdagskvelden (1. nov) var det fyr i vedomnen i den gamle skulestova i Årvik.  Det lyste ut gjennom vindauga. I den mørke kvelden kom ein etter ein og fann seg plass på dei gamle skulepultane. Felles var eit ynskje om å få ta vare på minna om ei tid som var. Dei eldste som er bortimot 60 år kan hugsa skuleåra her. Alle borna i ei skulestove. Leiken ute på prærien, som det flate jordstykket nord for Fosselvegen vart kalla.

Stundom kjem det folk og spør om å få låna nøkkelen til skulestova. Dei har med seg slekt som er på besøk og vil gjerne visa dette unike bygget og fortelja: - Her gjekk eg på skulen då eg var liten. Fagfolk innan museum har sagt at dette huset har sin spesielle verdi fordi det ligg nettopp her. Slik hadde borna det når dei leika i friminutta. Ein annan stad ville det vore berre å visa fram gamalt inventar, men her er sjølve sjela i huset. Slik var det. 

Denne kvelden var dei samla 7-8 stykk, ennå i arbeidsfør alder, ikkje berre frå denne skulekrinsen. Dei fleste tok til i skulen etter at Årvik skule var lagt ned. Nokre hadde opplevd å ha ein skuledag her i gamle klede. Historie og samfunnskunnskap.  Dei ville verna om historia til denne grenda. Dei vil la borna og barneborna få del i vår lokale historie.  Våre røter i strevsame kvardagar - langt tilbake til ein skule som vart lagd ned i 1962.

Under leiing av Jarle Årvik vart vedtekter lesne opp, kommenterte og vedtekne. Ei foreining vart stifta: - Foreininga sitt namn er Årvik Skule og vart stifta 1.11.2012, las Jarle opp.  Dei nikka til. - Slik gjer vi det.  Så ber vi kommunen om å få overta huset.  - Me må ta taket av huset og fiksa det, vart det konkludert.  Det har ikkje vore lekkasje i huset, så det let seg reparera.  Fleire av dei frammøtte er erfarne snikkarar.  Jo, huset skal fiksast, var dei samde om.  Så vil dei prøva å ha opne dagar der folk kan få koma og sjå korleis skulen var før. Vaska og rydda så det blir triveleg der.

Etter vedtekter var vedtekne gjekk dei til val på styre.  Kjell Erik Gangstø vart leiar. Lene Skartland, Grethe Karin Tindeland og Cathrine Hamre Tindeland vart styremedlemmer og Jarle Årvik varamann. 

Eigentleg burde bygda hatt eit aktivt sogelag som kunne verna om dei kulturskattane som er att.  Nå rotnar dei ned ein etter ein, men ikkje alle. Årvik skule er ein av dei som det er både vilje til å berga og von om å lukkast med.

Les meir om saka her 

Skal vi ta vare på skulemuseet i Årvik?
Ope møte om framtida til
den gamle skulen i Årvik

Kommunen krev at det er etablert ein eigarstruktur som lag, foreining, stifting eller anna som kan stå som eigar.  Frist for dette er utgangen av år 2012. Utvalet som har jobba med dette lokalt i Vikebygd, kallar nå inn til ope møte på Årvik gamle skule,
Torsdag 1. nov. klokka 20:00

Klikk på plakaten for å sjå større utgåve

Vil vi ta vare på skulemuseet i Vikebygd?
Kommunen vil flytta innbuet i skulemuseet i Årvik ut av Vikebygd og brenna bygget.  (30.3.2012  Steinar S)

I sakspapira til DUK - utvalet for Drift, Utvikling og Kultur - står det:
(Saka skal også opp i kommunestyremøte 17.4.12. Sakspapira for  finn du HER)

"Årvik skule i Vikebygd er det kommune-styrevedtak (2006) på at ei stifting i Vikebygd skal overta. Stiftinga er ikkje etablert og overdraging er ikkje utført. Straum er innlagt, men bygget byrjar å bere sterkt preg av manglande vedlikehald. Skulen har ikkje nytta bygget dei siste 4-5 åra. Kommunen eig ikkje grunnen bygget står på, slik at det ikkje er ein eigedom som kan seljast.
Bra med inventar for ein skule med drift på 50-60-talet."

Sogelaget i Vikebygd har lege nede i fleire år.  Kommunen har sendt saka på høyring til Ølen og Bjoa sogelag, som uttalar at:
 
Årvik skulemuseum bør avviklast, men at inventaret kan flyttast til Sandeid. Dei gir uttrykk for undring over at bygda Sandeid ikkje i større grad har vist interesse for museet.

Rådmannen si vurderinga av saka:
Skulemuseet i Årvik har ei uavklara stilling. Gruppa som fekk overteke ansvaret i 2006 har
hatt vanskar med å laga ei juridisk organisasjon som formelt kan overta huset slik vedtaket
var. Gruppa bør få frist ut 2012 på å ordna dette. Dersom dette ikkje er på plass bør
kommunen sikra seg det mest aktuelle inventaret og så rive huset, eventuelt gi det til
grunneigar dersom han er interessert.

Utdrag frå Rådmannen sin konklusjon:
Kommunen bør maksimalt drifta eit skulemuseum. Dersom det skal vere eit skulemuseum i
kommunen bør det vere museet i Skjold som blir verande. Føresetnadene nemnd i
utgreiinga over må gjelda, og særleg bør det sikrast at Haugalandsmuseet gjennom
Vindafjordmuseet tek ansvar for skulemuseet.

Avtale som sikrar overdraging av Årvik skule til stiftinga / organisasjonen som vil ha privat
skulemuseum, må vere på plass i løpet av 2012. Bygningen blir elles tilbode vederlagsfritt til
grunneigar. Kommunen bør sikra aktuelt inventar til museet i Skjold. Dersom grunneigar ikkje vil overta blir det vurdert å rive eller brenne huset. 

Det blir sett på som svært viktig at framtidig skulemuseum blir aktivt nytta av barn.
Rådmannen vil difor at Vindafjordmuseet, som ein del av overtakinga, forpliktar seg til å laga eit opplegg som kan brukast av aktuelle klassetrinn på dei nærmaste skulane, enten dette skjer ved at museet er til stades eller ved hjelp av lærarar i klassen Opplegget bør kunne nyttast i Skjold eller i avdelinga som er tilrettelagt i Vikedal.

DUK-019/12 VEDTAK:
1. Den gamle skulen som står ved skuleplassen i Sandeid (sjølve bygningen) blir lyst for sal for ei krone. Dersom det ikkje blir nokre som vil overta bygningen skal bygningen rivast.

2. Avtale som sikrar overdraging av Årvik skule må vere på plass i løpet av 2012.
Bygningen blir elles tilbode vederlagsfritt til grunneigar eller rive.

3. Skulemuseet i Skjold blir overført til Vindafjordmuseet. Rådmannen blir bedt om å få laga ein avtale med Vindafjordmuseet / Haugalandsmuseet slik at dei tek over ansvaret for det faglege innhaldet, utstyr og vedlikehald av skulemuseet. Utgifter på inntil 40.000 kroner blir å innarbeida i neste budsjett.
 
Sakspapira for Kommunestyre møtet finn du HER