Grendeutvalet i Vikebygd har bestemt å samle inn bilete som kan nyttast til reklame for bygda i ulike samanhengar. Til dette arbeidet treng me alle gode krefter med på laget.

Me ønskjer å bygge opp eit bildearkiv med motiv frå Vikebygd og alle hyggelege aktivitetar som skjer i bygda. Dette kan vere alt frå 17. mai feiring med tog og leker på Bygdahuset, sommar og badeaktivitetar, motiv frå den flotte naturen vi omgir oss med eller bilde frå fisketuren med «den største fisken nokon - nokon sinne hadde sett»...

Bakgrunn
Grendeutvalet har heile tida fokus på aktivitetar som kan bidra til å auka tilflyttinga til Vikebygd. Her er det mange element som har innverknad på den kontinuerlege prosessen for å gjera bygda betre kjent i regionen på ein positiv måte. Grendeutvalet ønskjer derfor å samla inn alle sortar bilde frå Vikebygd som viser kor attraktiv, sosial og hyggeleg denne bygda er.

Bilda er i fyrste omgang tenkt brukt i ein enkel presentasjon om Vikebygd på nett. Presentasjonen skal gjerast tilgjengeleg på Vikebygd.no og andre stader kor det kan vera naturleg.