Då Radio 102 starta sommarshowet, direkte sendt frå Plassabakeriet i Vikebygd, var det fullt hus og eit strålande sommarvêr. Mange familiar, born og ungdom stilte opp.  Dei unge gjestene hadde som mål å sikra seg flaskepost med mulig premie.  Radio 102 reporterane hadde med seg ein full sekk som gjekk på sjøen og borna stupte etter. Nokre klarte å få kloa i både 2 og 3 flasker.  Inni var det eit skriv med loddnummer på og liste over gevinstar dei kunne vinne, om dei var heldige.

Alle med eit slik flaskepostlodd kunne registrera nummeret sitt og bli med i trekninga om ein båt til verdi kr 30.000,-.

Etter dette stuntet var det nok mange av dei unge som rusla heimover. Andre gjekk til teltet for å få seg komle-middag, eller for å stille seg i kø ved bakeriet for å kjøpa nysteikte snurringar. Bjørn hadde fyrt denne natta og, slik at bolledeigane kunne bli klar. Mest var det for å ha desse klar til meisterskapen i bolleeting.  Men mange fekk også kjøpa med seg heim, sjølv om det berre var ein deig denne dagen. Bjørn kunne ynskja velkommen tilbake laurdag, då blir det stor steiking igjen.

Ute var temperaturen 25 grader i lufta. Kor varmt det var inne i bakeriet var ikkje oppgitt, men Bjørn var nok den som sveitta mest der han heldt på med baking og steiking av snurringar.

Margareth kom på direkten i starten av sendinga og fekk dela god reklame for både bygda og Plassabakeriet, der ho var innom både historia til bygningane, og korleis det er å driva sommarskafe i Vikebygd med rikesleg av  hyttefolk og båtturistar i tillegg til bygdefolket. Reporterane Thor Magnar Thorsen og Helge Houeland frå Radio 102 var  interessert i kven det var som var gjester - om det var mest hyttefolk, og kva som skulle til for å bli godt integrert i bygda.  Og rett nok. Feriegjester er nok i fleirtal denne dagen også, men  ein del fastbuande i bygda og nabobygdene la turen til komlemiddag og underhaldning på Plasssabakeriet. Lytt til intervjuet her

Tom Roger og Eirik live.
102 sommarshowet hadde også levande musikk under sendinga. Det stod Tom Roger Aadland for i lag med eldste sonen, Eirik Ørevik Aadland. Saman vart det både eigen komponert "Sommaren uten ende" og Bob Dylon låt på nynorsk (Nett som ei kvinne).
Lytt til musikken her

Ein annan som måtte på lufta var Gunn Vikingstad. Radio 102 hadde merka seg kvinna frå Karmøy som hadde overteke Joker butikken. Gunn meinte sjølv at ho var ein person som lett kunne endra seg og tilpasse seg noko nytt og hadde tru på framtida for landhandelen i bygda. Ikkje minst har ho framleis mange idear og tanker i hovudet som ho ser for seg å utvikle, men butikkdrifta vil ho halda fram med til pensjonsalderen kjem.
Lytt til intervjuet her

Nede i sjøkanten har det vakse opp eit sjøhus, kopi av det som stod her til utpå 50-talet då det gamle vart øydelagd av ein storm som tok den øvste etasjen. Det nye, som er i same stil som det opphavlege skal husa utleige-leiligheit, fortel Bjørn. Kanskje blir det aktuelt også til utleige for kurs og møter. Med soverom på toppen kan det bli flott å vakna opp til utsikt utover Vikevika og fjorden. Opphaldsrom i andre høgda og toalett mm i første høgda. Ute ser det ferdig ut, men inne står mykje arbeid att. Ein god fagmann er hyrt inn for å få kvalitet på byggverket.

Plassabakeriet

Sitat frå Plassabakeriet si Facebook-side onsdag 19.:
-Ein fantastisk sommardag er over - den var alle vel unt - oss og. I morgon (torsdag) er tradisjonen tru Radio 102 sitt sommarshow på Plassabakeriet. Me fyrer opp i bakaromnen og det blir konkurransar og flaskepost. Thor Magnar er klar frå kl. 12:00. Frå kl. 13:00 er komlene klar - med håp om ein ny flott sommardag. Velkommen

Godt over 20 grader onsdag 19. juli,

Natt til fredag kan det bli regnbyer, men i helga er det venta nytt finvêr.

Det var kø ved bakeriet til langt utpå ettermiddagen lørdag 6. Med godt vêr var det stadig nye som kom til for å handla nysteikte snurringar.

Bjørn Vik hadde fyrt i steinomnen frå kvelden før, og hadde ein lang dag i bakeriet. Varm og sveitt var det han som sette deigen i omnen og tok ut dei ferdigsteikte snurringane, som så vart selde før dei rakk å bli kalde.

Kan ikkje klaga på omsetnaden her i eit bakeri av den gamle sorten, der alt er som det var då Plassabakeriet blei bygd av Georg Gautesen i 1842.

Vikevik hadde landhandel og bøkkerverkstad i tillegg til bakeriet, og kundane var i tillegg til å vera lokale folk, fiskarar. Når fiskarane skulle på brislingfiske kjøpte dei med seg ei heil tønne med brød. Dei som arbeidde i bakeriet var bakarmeisteren, ein lærling og ein ekstra hjelpar av og til. Den siste lærlingen på Plassabakeriet heitte Einar Eidsvåg. Han kom roande over fjorden frå Sveio og gjekk i lære dei siste to åra det var drift. Etterpå drog han til Sauda starta eige bakeri der, og fekk nokre søner. Ein av dei heiter Bjørn Eidsvåg og blei den kjende rockepresten.

Etter oppstarten var bakeriet i drift i nøyaktig 100 år, til 1942. Under krigen var det blitt svært vanskeleg å få fatt i mjøl, så til slutt var det kroken på Plassabakeriet si dør. Eitt unntak blei likevel gjort: Då det blei feira bryllaup i Vikevik i 1945. Då fyrte dei opp i den gamle omnen til ære for brudefolk og bryllaupsgjester.

Tidlegare var bakeriet berykta for julebrøda og vasskringlene sine. Å bake vasskringler er ein gamal kunst; kringla blir først kokt i vatn og steikt etterpå. Det driv dei ikkje med i dag, det er ein kunst som erfarne folk driv med til dømes på Gamle Bergen.

Bakeriet blei gjenopna i 1993 på den Europeiske Kulturminnedagen Margaret og Bjørn hadde inga erfaring med baking i steinomn, så det blei mykje prøving og feiling med tilhøyrande svidde brød. I dag er og kundane båtfolk, men kjem meir i skjærgårdsjeep enn fiskeskøyter.