Om det var lite som møtte opp på informasjonsmøta i forkant, så var det desto fleire som møtte på årsmøtet i SØK på Ølen kulturhus måndag 13. mars. 259 røysteføre stilte seg i kø og med fullmakter representerte dei 366 andelar. Møtet skulle ta til klokka 18:30, men det tok tid å klara å kontrollera og registrera alle fullmakter.  Nær to timar på overtid kunne møtet ta til, men folket som møte frå Skånevik, Åkrafjorden, Ølen, Bjoa og Vikebygd viste tolmod og nytta tida til å prata. Arrangørane måtte dobla sitjeplassane i salen for å få alle inn.

Rekneskap og årsmelding viste eit selskap med god økonomi og god drift.  All investering er gjort utan låneopptak. Årsaka til at ein likevel vil endra selskapet er nye retningsliner frå staten som vil gjera det vanskelegare å driva. Kristoffer Vannes viste med plansjar at SØK var over høgda av si glanstid og står føre store utfordringar. Difor var dette rette tid å gjera endringar på. Retningslinene som kjem gjer at dei må dele opp verksemda i kraft, nett og breiband. Leiinga kan ikkje vera den same i konkurranseutsett og monopolbasert verksemd. Desse Å driva som før var dermed ikkje eit alternativ på sikt.

Dei vanlege årsmøtesakene gjekk kjapt før Kristoffer Vannes, dagleg leiar i Skånevik Ølen Kraftlag, kunne ta til med å gå gjennom hovudsaka: Om årsmøtet kunne godkjenne Omdanningsplan for å gjera kraftlaget om til eit aksjeselskap. 

Om det ikkje var mange som tok ordet etterpå, så var dei aller fleste samstemde om at dette var det beste for kraftlaget si framtid. Berre ein andelshavar tok hardt til motmæle og ville ha saka utsett for å få utgreidd andre alternativ til samanslåingar. Men i røystinga over dette utsetjingsforslaget fekk det berre hans eiga røyst.  Den endelege voteringa var samrøystes og vedtaket lydde:

"Årsmøtet godkjenner omdanningsplanen datert 10. februar 2017 for omdanning av Skånevik Ølen Kraftlag SA frå samvirkeføretak til aksjeselskap."