Tore Espeland og Rune Hetland hadde hand om mikrofonen laurdag 29. april, og las opp namna på spelarane før desse 'bukka' for Siv Bente Larsen og fekk ein fin medalje om halsen. Deretter var det tid for diplom med bilde av laget. Litt krevjande var det å få laga alle diplomane, så nokre av laga måtte få desse ettersendt.

Nøyaktig kor mange som deltok på Vikeputten, har ein ikkje tal på, men Tore Espeland tar ei rask hovudrekning og anslår at det må ha vore bortimot 550 på dei 73 laga som spela til saman 110 kampar denne dagen. Og alle måtte i tur og orden fram og bukke for å få hengt ein medalje rundt halsen. Her var det ikkje taparar, men berre vinnarar.

Dei yngste på laga
gjekk ennå i barnehagen
Dei yngste var ennå i barnehagen. G6 og J6 står for at dei blir seks år i løpet av året, og dermed går dei yngste, som er 5 år, ennå i barnehagen. Dei fekk spela kampane sine inne i Kjekt-i-Vik hallen tidleg på dag. Kunstgrasbanen var delt på tvers i fleire banar med eit lågt nett slik at ballen heldt seg på rett bane. Kampane her var målrike. Fleire lag var oppe i 12-15 mål før kampen på to gonger ti minutt var over. Kvart lag fekk spela tre kampar før dei var klare for medaljeutdeling og diplom.

At det var så unge med er ei satsing frå Noregs Fotballforbund som har oppfordra at laga skal la borna bli glade i fotball så tidleg som mogeleg. I NFF sitt verdigrunnlag for barnefotballen, står skreve: "Barnefotballens verdigrunnlag bygger på tre pilarer: Fotball for alle, trygghet + mestring = trivsel og Fair Play". Ei mor kunne strålande fortelje om laga frå Etne og Vindafjord, som ikkje kjende kvarandre frå før, dei vart vener og sat lenge og prata saman etter kampen.

Kjekt i Vik og alle var vinnarar
Mange som kom frå andre bygder måtte skryta over Vikebygd og eldsjelene i idrettslaget som hadde fått til eit slikt bra arrangement og ikkje minst den store og flotte "Kjekt-i-Vik" hallen som kom til veldig god nytte.  Kald vind og overskya vêr prega føremiddagen då dei minste fekk spela innandørs. Etter kvart skein sola opp og himmelen vart blå. Då steig temperaturen også litt.

Dei kom for å spela mot kvarandre, men alle vart vinnarar. Om dei vann eller tapte den eine kampen, så var dagen ein festdag. Ingen veit kor mange som var på idrettsbanen, men eit overslag seier at det truleg var omlag 2000 personar innom. I tillegg til borna var det med foreldre, lagleiarar og trenarar, søsken, besteforeldre og bygdefolk. I kiosken og ved grillteltet var det full køyr heile tida. Omlag 70.000 kroner vart bytta med mat og godteri. Litt mindre omsetnad enn i fjor, kommenterte kasseraren, men kunne oppsummere at dette var ei god inntektskjelde der folk også kunne betala med M-Cash på mobilen.  I tillegg var det inntekter i form av det laga betaler i påmeldingsavgift og sponsorar. Overskot frå Vikeputten gjennom fleire år har vore med og finansiert hallen.

Eit slikt arrangement krev ikkje berre spelarar, men også dugnadsfolk som stiller opp og gjer at alt fungerer.  Heine Maurangsnes var ein av dei som hadde dommarfløyta og sørgja for fair play. Berre for å dømma kampane måtte dei ha bortimot 30 dommarar som skulle dela på dette gjennom dagen. På det meste gjekk kampar på 10 banar samtidig. Til saman 110 kampar frå morgon til kveld.

Laurdag 29. april - Vikebygd
Fotballturneringa VIKEPUTTEN
Informasjon frå idrettslaget, 12.4.2016

73 lag er påmelde
110 kampar skal spelast på 1 dag
Over 2000 personar på idrettsplassen

Vikeputten har også i år fått svært god påmelding. Det blir i alt 73 lag med og det skal spelast over 90 kampar laurdag den 29. april. Dei som har vore med før gir uttrykk for at dei er nøgde og det skal dei bli i år også!!  Med spelarar, lagleiarar, foreldre og publikum vil det vera over 2000 personar innom arrangementet.  Dette krev god førebuing og gjennomføring.