Over 150 store og små tok turen i solskinet frå Vikebygd og Bjoa. Oppe på Vikestølen var det konkurranse i hesteskokasting, loddsal, og høve til å kjøpa seg lapskaus, pølse i brød, kake, kaffi og saft. Alle dei som registrerte seg fekk ein diplom, som dette året var teikna av Mari Edona Tveit.

I hesteskokast var det stor variasjon i dugleiken, men førsteplassen vart delt mellom Ola Harald Alne og Eivind Gangstø, kvar med 27 poeng. Dei vart premierte med kvar sin bærplukkar. Den som var jamnast i sine treff var vel likevel Eivind, som i fem rundar oppnådde 20-26-22-20-27 poeng.  Mellom borna vart vinnarane Thomas med 19 og Johanne med 12 poeng.

Fast innslag er også å trekkja ut ein ryggsekk mellom dei som har vore innom Vikestølen siste året, og skreve seg inn i ei gratis-loddbok. Jarle Sandsgård i hyttestyret fortalde at i år hadde det vore ekstra mange innom. 4-500 meir enn i eit vanleg år. I tillegg kjem at ein god del er på tur innom Vikestølen, utan å skriva seg i boka. Men i alt hadde han registrert 1240 namn i boka.  Bergfrid Kolltveit, som hadde vore på Vikestølen 25. april, vart trekt ut som vinnar av sekken i år.

Fjella i Vikebygd har mykje fint å by på. Sætrefjellet med ei fin løype som Roald Årvik har merka frå Vikebygd via Stemmevatn, og gjerne vidare til Ulserhaug og Bjordal.