98 løparar og 19 «småtroll» deltok i krets-orienteringsløpet som o-gruppa i Vikebygd hadde ansvaret for søndag 30. april.
av Jon Magne Svendsbøe 3.5.2017

Ein herleg, solrik vårdag møtte dei 98 løparane og 19 «småtrolla» som kom køyrande til kretsorienteringsløp i Årvik søndag 30. april. Toralf Gåsdalen og Jone Bjerga sørgde for at alle parkerte tett på velteplassen ved beitet til Oddvar Hølland som var dagens samlingsplass.

Dagens vinnar i herreklassen, Arild Aasheim, Ganddal IL, og familien hadde faktisk kortast veg til dagens løp der dei kom i båt frå hytta på Håvardsholm. Men dei som hadde reist lengst kom frå Rakkestad i Østfold, Fana i nord, Odda i aust og Egersund i sør.

I kiosken under open himmel selde Inger og Juli-Janne Gåsdalen frukt i beger, kaffi, te og ikkje minst vafler som blei steikt på plassen. 19 unge gjekk den merka småtrolløypa med fem postar rundt det grøne beitet. Nybyrjarane hadde eigen start kor dei kunne starta når dei ville. Dei kunne følgja leielinjer som vegar og gjerder som postane var plassert langs. Alle under 12 år får premie.

Klasse 17-18 og 40-45 år med bl.a. Anne Sofie Sandvik, Bjoa IL til høgre

Klokka 13 var første fellesstart med eldste deltakar, Ingebrigt Gule frå Vats som er heile 78 år gammal. Han skulle gjennom den 4,1 km lange løypa som alle andre i herreklassen. Seks minuttar seinare starta dei som er mellom 70 og 75 år, blant anna vår eigen Harald Steinsland. Enno seks minuttar seinare starta 65-70 åringane. Like etter at desse hadde starta kom Ingebrigt Gule overraskande joggande tilbake frå skogen. Han hadde mista brillene og måtte innom samlingsplass etter nye før han med friskt mot la på sprang ut i skogen att.

Senioreliten på start med bl.a. Einar Marius Hjellestad Martinsen

Klasse damer 45-50 år

Deretter starta 13-14 åringane, 15-16 åringane, 17-18 åringane og til sist senioreliten mellom 19 og 40 år. Alle jakta på dei tidlegare startande og første kvinne/jente og mann/gut i mål blir vinnar av Vikesprinten.

Einar Martinsen hadde laga utfordrande løyper i det vanlegvis tungløpte terrenget mellom brakar og over tunge myrar i skogane til Oddvar Hølland og Jarle Årvik.

Nokre blei ganske forfjamsa når dei møtte Jarle sine storfe andlet til andlet i skogbrynet på eit strekk, men dei er så godlynte at dei ikkje var noko å vera redde for.

I mål venta Jorunn Tjoflot Nes bak PC-skjermen ved målposten saman med Jon Magne Svendsbøe og Kjersti Bjerga i sekretariatet.

Einar hadde laga publikumsvennlege løyper mot slutten av løpet då løparane måtte kryssa beitet på veg til dei to siste postane. Dermed kunne alle på samlingsplass sjå dei tette duellane mot mål. Spenninga var stor når dei første kunne skimtast i skogkanten aust for samlingsplass. Dameløparane som sprang ei 3,3 km lang løype var først på veg mot mål. Ikkje overraskande var det fjorårsvinnar Vilde Margrethe Sæbbø, som berre er 14 år, som hadde fått ei bra luke til vinnaren av vandrefatet for to år sidan, Janne Tjørhom Aasheim, Ganddal IL. Dette blei også rekkefølgja i mål med Inger Tone Nygård frå Egersund på tredjeplass.

Vinnarane i årets Vikesprinten:
3. Inger Tone Nygård (Egersund OK), 1. Vilde Margrethe Sæbbø (Stavanger OK), 2. Janne Tjørhom Aasheim (Ganddal IL), 2. Sigurd Paulsen Vie (Haugesund IL), 1.Arild Aasheim (Ganddal IL)

Og som i dameklassen var det same herreløpar som vann i år som i fjor, Arild Aasheim, som opprinneleg er frå Stord. Men også i herreklassen hevda ungdommen seg då Sigurd Paulsen Vie, Haugesund IL, og 16 år spurta i mål ikkje langt bak Arild. Deretter strøymde det på med løparar mot mål. Resultata var raskt ute av skrivaren og hengt opp på resultattavla.

Berre to timar etter første fellesstart var premieutdelinga i gong.

Etter ein effektiv dugnad på å rigga ned samlingsplassen og henta inn postane i skogen var det ein godt nøgd arrangørstab frå o-gruppa i Vikebygd IL som køyrde materiellet tilbake til klubbhuset.

Det var berre godord å høyra om løypene, terrenget (som mange trudde skulle vera tyngre) og den fine samlingsplassen.

Tusen takk til alle som var med og organiserte det årvisse kretsløpet, og tusen takk til Oddvar Hølland og Jarle Årvik for godt samarbeid og lån av beite og utmark.

Har du lyst til å prøva turorientering?
Bli med på trening tysdag 2. mai !

- Har du lyst til å prøva eller læra om turorientering? spør Kjersti Hausberg Bjerga og fortel 1. mai at:
- I morgon (tysdag) er det trening på Krekavegen kl. 18:00 - ca.
kl. 19:30. Me brukar turorienteringa som er lagt ut, så har du kjøpt, så tek du med. Har du ikkje, så får du eit lite utsnitt slik at du får trent og sett korleis turorientering er.