Vikebygd kyrkje
Eit kunstverk er på plass

(25.3.2012 Steinar S)  Endeleg er den ferdig og på plass i kyrkja.  For nokre år sidan tinga Vikebygd sokneråd ein ljosglobe, laga etter mal frå ljoskrunene og utsmykkinga i kyrkjebygget.  Pensjonist og smed, Paul Magne Storebø på Stord, tok på seg oppdraget å laga ljosgloben i smijern. 

Sviktande helse og ei krevjande utforming har ført til at tida gjekk lengre enn ein tenkte seg då globen vart tinga, men nå er den ferdig.  Det høver godt å få denne på plass nå når det nærmar seg 75 års jubilèet til kyrkja vår. 

Mange kyrkjer har opp gjennom tidene kjøpt inn ljosglobe som nyttast i ulike liturgiske samanhengar, m.a. når kyrkjelyden skal minnast dei som er gått bort siste året. Den er ofte nytta i sorg samanhengar, men det er og kyrkjelydar som nyttar den til å tenne ljos for å markere glede.  T.d. når barn vert døypte. Andre set ljogloben ved inngangsdøra.  Slik kan dette bli ein personleg andakt utan å måtta gå fram og vise seg.

I dag er det meir og meir vanleg å få laga ljosglobar etter mal frå utsmykkinga i kyrkja.  Slik vart også malen lagd for den ljosgloben som nå står i kyrkja i Vikebygd.

Vikebygd sokn har tidlegare fått pengegåve frå både laget Vikebuen og SR-Bank i Ølen.  Til saman kr 9500,-. Resten av kjøpesummen vert dekka av innsamla og oppsparte midlar soknerådet rår over.

Les meir om tankane bak og bruken av ljosglobar her

Søndag 18. mars var det gudsteneste i Vikebygd kyrkje.  Her vart trillingane Liva, Edle og Daniel borne til dåpen.  Ei hending som bår der høgtideleg for familien, men også for kyrkjelyden som får ta del i dette.  For borna er dette også ei markering av at dei vert lagde til kyrkjelyden som medlemmer av Den norske Kyrkja. 

 
Etter Gudstenesta var det kyrkjekaffi og årsmøte for kyrkjelyden i Vikebygd.  Leiar Brit Nelly Ness Tveit orienterte om aktiviteten i kyrkjeåret og presen-terte  årsmeldinga. 

Les årsmeldinga for 2011 her.

Kyrkjelege endringar
Vindafjord vert overført til Haugaland Prosti

(17.3.2012 Steinar S)  Etter at Vindafjord kommune vart flytta over frå Hordaland til Rogaland, så vart den lokale kyrkja ein del av Stavanger Bispedøme og Nordre Ryfylke Prosti.  Etter lengre tid med drøftingar korleis framtidig prosti inndeling skal vera, vedtok Stavanger Bispedøme i november i fjor å endra prostigrensene og å oppretta både Haugaland Prosti og Ryfylke prosti.

Kyrkjeverja vår, Inghart Lasse Tveit, opplyser at Kyrkjedepartementet nyleg har fastsett endringar i prostistrukturen i Stavanger bispedøme. Dette inneber at Vindafjord kommune vert overflytta frå Nordre Ryfylke prosti til Haugesund prosti – som samstundes får nytt namn – Haugaland prosti.

Dette prostiet vert då samansett av kommunane Vindafjord, Tysvær, Bokn, Haugesund og Utsira. Heretter vert altså prosten å finna i Haugesund - ikkje i Sauda. Dette inneber vidare at Vindafjord også vender seg utover eller vestover med omsyn til kyrkjeleg samarbeid og fellesløysingar som måtte bli aktuelle i samband med kyrkjelege reformer som er på trappene.

I mars-utgåva av kyrkjebladet Hyrdingen, er dette nærare omtala.

Nytt prosti i Ryfylke
Det vert vidare laga til eit nytt prosti – Ryfylke prosti – samansett av kommunane Sauda, Suldal, Hjelmeland, Stand og Forsand. 6. mars vedtok departementet at prostesetet her blir på Hjelmeland. Endringane skjer frå det tidspunkt bispedømmerådet vedtek, men mykje tyder på at desse endringane vert gjennomførte hausten 2012.  Då sluttar nåverande prost i stillinga si for å gå over som pensjonist.  Nytilsetting vil best kunna gjerast i den nye kyrkjelege organisasjonen.

Ny kyrkjeordning drøfta på historisk grunn
Når Grunnlova etter planen vert endra våren 2012, vert også relasjonen mellom staten og Den norske kyrkja endra. Det statlege kyrkjestyret opphøyrer, og kyrkja skal utnemna prostar og biskopar sjølv. Det tverrpolitiske forliket frå 2008 seier imidlertid ingen ting om korleis kyrkjelov og kyrkjeordning skal sjå ut etter dette.