Vikebuen - aktivt kvinnelag i Vikebygd

(19.2.2012 SS)  Vikebuen kallar seg sjølv: "Ein flott gjeng med damer i alle aldrar." Nå er dei 85 medlemmer og inviterer fleire til å registrera seg ved å betala ein medlemskontingent på 100 kroner. 

Formålet med laget er at damer på tvers av generasjonar skal ha eit sosialt samvær og ta opp tema dei er opptekne av.  Dei har sett seg som mål å skapa trivsel i lokalmiljøet og støttar andre lag med pengegåver (t.d. korpset og leikeplassar). Denne våren går dei til innkjøp av hjartestartar som vil bli plassert ved Bygdahuset.  Då vil dei også arrangera kurs i bruk av denne.  Laget har møte den 1. torsdagen i kvar månad og arrangerer i tillegg både sommartur for medlemmane og julemesse før jul.  

Styret inviterer fleire medlemmer
Styret er nå samansett av Ingrid Sørvåg, Linda Langeland, Hilde Fredriksen, Inger Kathrine Sundve og Beate Håland.  I brev dei har sendt til alle heimane i bygda skriv dei at kvinner som vil melda seg inn kan betala inn kr 100 til konto nr.: 3240.16.57737, og merka den med "kontingent 2012."

Laget har også oppretta eiga Facebook side.  Her vert medlemmene minna på at Tysdag 21. februar er det 3. tysdag i månaden og ny strikke/ oppskriftskveld på Gamlatunet. Det er ope for alle som har lyst, ikkje berre profesjonelle strikkarar.L

LAST NED VIKEBUEN SITT
AKTIVITETSPROGRAM FOR 2012 HER