|
9. mars arrangerer skulen:
Kulturettermiddag. Tema: "Vikebygd før og
no."
 (9.3.10 Steinar)
Det er etter kvart ein årleg
tradisjon der skulen arrangerer kulturettermiddag for og i Vikebygd. Temaet i år var: "Vikebygd før og no".
Skuleborna hadde gjort ein kjempeflott innsats med å illustrera med bilete og
ting korleis bygda har endra seg dei siste hundre åra. Og det vekte interesse.
Foreldre og besteforeldre kappast med å finna svar på konkurransen mellom
utstillinga.
Det var trongt om borda når
alle i bygda kunne få kjøpa seg middag med kjøttkaker, eller kaffi og kaker.
Etterkvart samlast dei og fylte storesalen der det
 var
song, dans og framføringar av borna. Kjempeflott arrangement
der Tobias Steinsvik og Håvard Larsen skifte på å vera konferansier og leia
arrangementet frå scenen. Kva som var hovudattraksjonen er ikkje så godt å
sei. Borna gjorde ein imponerande flott jobb og var kledde for skuledag i gamald tid. Men mange venta nok og på Tom Roger
 Aadland, som skulle syngja songar han har oversett og redikta frå Bob Dylan til
nynorsk. Han starta opp med songen: "Vikla inn i Blått". Ein kjend
song frå tida før desse skuleborna i Vikebygd var fødde.
Ei ungdomsgruppe hadde intervju med Tom Roger midt
i konserten. Dei fekk musikaren til å røpa at han i ungdomen hadde skofta
gitartimar for å få spela fotball saman med nabogutane. Elles høyrde
han på mykje musikkprogram på radio i den tida. Det var nok helst Beatles
som falt i smak og elles Vidar Lønn Arnesen.
- Men kva fekk deg til å velja å oversetja Bob Dylan sine songar til nynorsk?
ville borna vita.
- Det var eigentleg ein konkurranse Dagbladet arrangerte i oversetjing av
songar, fortalde han. - Eg deltok ikkje, men vart inspirert til å prøva sjølv.
Og å syngja på nynorsk er å syngja på eit språk vi brukar og forstår. - Så
Dagbladet skal ha litt æra for at eg kom i gong.
Så heldt han fram programmet sitt og fekk salen
med på allsong på: "Barn av regnbuen."
|
