Den dugande vegbrumurmeisteren Paul A. Valen murte ein høveleg for som minnestøtta står på. På minnestøtta står dette skrive: ”Aar 1900 samledes vennene fra Skjold, Vats, Ølen, Bjoa og Vikebygd til det første møtet paa Vikestølen.” ”Kommer hid til mig, Alle I som arbeide og ere besværede, og jeg vil give Eder Hvile!” Matt 11,28.

For mange år sidan vart det reist flaggstong på Vikestølen, og på møtedagane vert flagget heist.

I dei farne åri har mange gode kristne vore med i styret for Vikestølsmøtene. Det vil føra for langt å nemna dei alle. Men utan at eg trur at eg gjer urett mot nokon, vil eg nemna ein av dei som i mange år stod i leiingi for desse møtene, og det var bonde Hans K. Dommersnes, eller ”Smeahansen” som dei kalla han i daglegtalen i bygdi. Han var med på det første møtet på Vikestølen, og like til han var over 80 år gjekk han til fots opp til Vikestølen. I alle åri då han var med i styret, gjorde han ein uvanleg god innsats.

Til Vikestølsmøtene har folket frå desse bygdene kome år etter år i mange generasjonar. Og evangeliet har vore forkynt til æra for Gud og Frelsaren Jesus Kristus. Mange rike minne har folket fått med seg frå sommarmøtene her.

”Det folk som frægt vil vera
Og vinna lukka lang
Det høgt Guds ord må bera
Som lyset på sin gang.

Gud, lat ditt ord då fylla
Kvar heim frå fjell til strand,
Og med sitt lys få gylla
Vårt fagre fedreland!”