Huset i Stien husa ein familie med 7 born for 110 år sidan.

Det var mange som reiste frå fattige kår i Vikebygd til det store Amerika. Mange hamna i Minnesota i Midtvesten eller Seattle i staten Washington på vestkysten av USA. Påskedagen kom to av etterkomarane deira attende til området. John Edvin Skartland, barnebarn av Johannes Olai Olsen Skartland som vart fødd i 1885. Han vaks på småbruket Stien, på Skartland.

Johannes gifte seg med Martha Gurine Veastad (f.1896) og saman reiste det unge paret med båt til  Amerika (ca 1914?). Det var nok støre sjansar for dei der enn i det vesle huset på småbruket Stien, der det var heile 7 born som vaks opp. (Johannes, Anne Martha, Ole Johan, Gunnar Bertinus, Gurine Helene, Elisabeth Amalie og Bernhard). Det må ha vore trongt ved det vesle kjøkenbordet den gongen. Tvillingane Gurine og Elisabeth finn vi att på det gamle skulebildet frå Årvik skule i 1912 (Sjå her bildet frå 1912
- dei to småjentene i 2. rekkje til høgre er Gurine og Elisabeth).

Det var første gong at John Edvin og kona fann vegen til plassen der han har sine norske røter. - Me er speidarar, sa dei. - Me reiser for å sjå korleis det er her, og så vonar me at andre i familien vil koma etterpå.  Dei sette også pris på å få sjå innom den gamle skulen i Årvik, der bestefaren og søskena hans gjekk på skulen.

Dei skulle vidare frå Vikebygd og opp til Balestrand, der Paula har sine norske røter.