Stortingsvalet 14. sept. i Vikebygd
Har vi det for godt?

(15.09.09 Steinar S.)  1/3 av dei røysteføre i Vikebygd valde å vera likegyldige til styringa av landet vårt.  Berre 2/3, eller 67,77 % møtte opp på bygdahuset for å røysta på Stortingsvalet (inkl.førehands-røystene).  Er grunnen at vi har det så godt at vi ikkje bryr oss om å delta i samfunnsdebatten og valet på dei som skal styra landet vårt?

I heile Vindafjord var det 71,68% frammøte.  Også dette talet er lågt. Røystene fordelte seg slik:

Resultatet frå oppteljinga i Vindafjord kan du sjå HER.

Kyrkjevalet 2009
Lokale repr. i Bispedømmerådet

(25.09.09 Steinar S.)  Eit av dei tre vala du kunne røysta på i Vikebygd den 14. september, var utsendingar til Stavanger Bispedømmeråd. Frå vårt prosti (Nordre Ryfylke Prosti) vart begge representantane innvalde. Dette er
Leif Christian Andersen (23 år),
sjukepleiarstudent frå Skjold og

Wenche Haugen (50),
lærar frå Nesflaten i Suldal.

I tillegg kom Johannes Leiknes Nag (30) - lektor fra Torvastad på Karmøy inn. Så nå har Nordfylket 3 representantar innvalde fra "leke medlemar".

Dei som er valde blir òg medlemmar av Kyrkjemøtet, som møtest etter påske 2010 og 2011. Her får dei vera med i styringa av kyrkja vår. Ekstra flott er det då at vi denne gongen har fått vald inn unge medlemar i bispedømmerådet. Kyrkja står overfor store utfordringar og tilpasningar av liturgiar, salmeval og dåpsopplæring. Her er det viktig å få med ungdomen.
 

Les meir om dette på
kirken.no
kirken.no/stavanger
h-avis.no

Val mandag 14. sept
Godt frammøte ved soknerådsvalet

(14.09.09 Steinar S.)  På bygdahuset i Vikebygd var det to røystelokaler. Stortingsvalet i litlesalen og soknerådet i det møterommet ved sida av.  128 møtte for å røysta ved valet på soknerådet, noko færre røysta og på kandidatar til Bispedømerådet. 

 

Brit Nelly Ness Tveit tek imot røyster

Oppteljinga viser at det nye soknerådet vert slik samansett:
Faste medlemar:

• Brit Nelly Ness Tveit

• Dag Hans Nagel-Alne

• Steinar Skartland

• Berge Thomas Velde

• Ellen Skretteberg

• Rolf Alne
  (+ soknepresten som ikkje vert vald)

5 varamedlemar:

1. Jenny Kristin Svendsbøe

2. Geir Mandius Vårvik

3. Marit Elise Erdal

4. Anna Marie Bjørnevik

5. Alfred Trovåg

Det var gjort mange endringar på røystesetlane. Både kumuleringar, endring av rekkefylgje og ein del strykingar.  Likevel viste det seg at eit klart fleirtal ynskte dei som var sett opp som dei seks øvste på lista inn i soknerådet. 

Det nye soknerådet vil ta til i tenesta den 1. november i år.  Dei skal då m.a. velja ein representant til fellesrådet.

For valet til Bispedømerådet var det noko færre som røysta.  Desse røystene vert sendt inn til Bispedømet og vidare til felles oppteljingssentral. Her skal setlane skannast og teljast automatisk av datamaskinar, før dei nye bispedømeråda er avklara.  Det vil derfor ennå gå ei stund før namna er klare her.  Les meir på www.kyrkja.no/stavanger 

Paneldebatt med 5 stortingskandidatar
Kari Vik Stuhaug fekk liv i debatten

(4.9.09) Paneldebatten med AP, SP, KrF, H og FrP på Ølen Kulturhus 3. sept. engasjerte dei 50 frammøtte med kjente saker som skatt, veg og olje, inntil Kari Vik Stuhaug i slutten av debatten måtte kjempa seg til å få låna mikrofonen. Ho etterlyste kvinner i debatten og omsorg for dei svake i samfunnet. Så krov ho at alle parti la fram synet sitt på alkoholpolitikken dei gjekk til val på, og ikkje berre fokuserte på dei harde sakene.

Les meir HER.

Det var omlag 60 personar samla i Ølen Kulturhus, mellom dei nokre få som tok vegen frå Vikebygd. Dei fem som sat i panelet er alle frå nordfylket og kjempar om ein plass på stortinget for å representera folket her i Rogaland. Då ordet endeleg vart gjeve fritt for tilhøyrarane var det mange som ville ha ordet. Engasjementet var høgt, men om tradisjonelle saker som vel dreier seg om korleis vi som har det godt skal få det endå betre. Først når Kari Vik Stuhaug forlangte å få mikrofonen, som alt var gjeven til ein annan, så vart det meir fart og varme. Ordstyrar Arne Frøkedal frå Grannar gjorde ein god jobb med å få debattantane i tale med gode spørsmål. Han hadde tenkt å slutta av debatten, då Kari greip inn, og dermed måtte møtet halda fram ennå ei stund før dei kunne takka for seg. Og om debatten som følgde etter Kari sitt innlegg, kan du lesa meir her.

(Sist endra 12.9.2009)