Den tredje presten takka for seg i Vindafjord.

Harald Eintveit tok til som sokneprest i dei indre sokna i Vindafjord i 2009. Etter mest 10 år i tenesta takka han for seg med gudsteneste og avskilsfest i Vikedal, den 30. desember 2018.

Soknepresten vaks opp på garden Eintveit i Åkrafjorden, på «Hi sio» som dei gjerne omtalar dei veglause gardane på nordsida av fjorden. Før han tok til som sokneprest i Vikedal, Imsland og Sandeid, var han 25 i teneste i Tinn kommune i Telemark. Det har nok styrka hans nynorske talemål, som han kombinerer med kraftfull og myndig røyst både når han talar i kyrkja eller i ander samanhengar. Ein god songar er han også og leier salmesongen godt i kyrkja. Men på avskilsfesten song han også duett saman med major i Frelsesarmeen frå Sauda.

Dei siste 9 åra har han halde hus i prestegarden i Vikedal. Der kjem han også til å verta buande framover då han nyss kjøpte dette huset. Kommunane har ikkje lengre plikt til å halda bustad til sokneprestane, og den nytilsette etterfølgjaren hans, har busett seg i Sandeid.

Etter gudstenesta søndag 30. desember, samla svært mykje folk seg på bygdahuset i Vikedal til avskilsfest. Her ville mange ha ordet og takke Harald Eintvedt for den tenesta han har utført og det gode samarbeidet mange har opplevd i lag med han. Ein mann som nok veit å seia tydeleg frå om det er noko han er samd eller usamd i.

Som svar på alle gode ord og ros under festen kommenterte Eintveit med myndig røyst:
-Dette er mest som julekvelden. Takk for gåver og rosande ord. Det er vel fortent, men kvifor har de ikkje fordelt desse også på dei andre ni åra?

Ja, han fortente takken og kanskje noko vi kan ta med oss om å fordela ros og takk utover dagane og ikkje samla desse opp til den dagen ein medarbeidar skal slutta?

Meir om avskilsgudstenesta og avskilsfesten kjem i Hyrdingen nr 1 i 2019 (februar).

ss