Vikebuen ga kr. 19.800 i bøssene!

I solskin og vind gjekk 8 vikebuar med bøsser og banka på alle dørene i bygda 22. oktober, i tillegg til dei to som stod for organiseringa. Alle vart godt mottekne, og var det nokon som ikkje hadde kontantar eller som ikkje var heime, så fekk dei ein lapp med kontonummer og VIPPS nummer for å kunna senda pengar elektronisk. Pengane skulle alle gå til TV-aksjonen med Unicef som mottakar og til deira arbeid for at born og unge i krigsområde skal få skulegong.

I heile Vindafjord kom det inn ca. kr 250.000, i dei 114 bøssene. Totalt var nær 130 personar i aktivitet med innsamling, organisering og oppteljing. Vi kan berre retta ei stor takk til alle som deltok og alle som ga.

Ikkje alt blir registrert i oppteljinga.
I tillegg til bøssene så var det ein næringslivstafett dagane før innsamlinga. I Vindafjord kom her inn kr 101.572 inkludert bidraget frå kommunen på kr 25.000,-. Midlar som kjem inn
via VIPPS vert også registrerte lokalt via bank, men direkte bidrag til aksjonen sin konto, vert ikkje fordelt på kommunen. Dei er likevel med i totalbeløpet på landsbasis.

Totalt i Vindafjord kom et inn kr 250.085 i bøssene og med andre registrerte bidrag er totalen kr 366.162. Ein reknar med at dette stig noko utover.
Vil du gi, kan du nytta VIPPS nr.: 2133 (valgfri sum), eller
SMS: send TVA til 2133 (250 kr).

Dei innsamla pengane skal gi barn i Colombia, Mali, Syria, Pakistan og Sør-Sudan tilgong på læring. Eit av fem barn i krig- og konfliktområde står i dag utan skulegong. Unicef jobbar hardt og målretta for at barn ikkje skal få øydelagt framtida på grunn av dei vaksne sine krigar og konfliktar. Skulegong gir born som lever i konfliktområde ein moglegheit til å læra, leika og vera saman. På sikt bidrar utdanning til å byggja opp att samfunn og gi håp for framtida.

Aksjonskomiteen vil takke for godt samarbeid og god hjelp frå frivillige til komitearbeid og som bøssebærar.

Følg med i kor mykje som kjem inn, her.    Les meir her