Konfirmantar og speidarar laga lys i kyrkja

Lysmessa i Vikebygd vart halden om kvelden søndag 4. desember. Ute var det mørkt og kaldt, men på himmelen lyste stjerner, planeten Jupiter og ein tre-kvart-full måne i aust. 

Inne i kyrkja var det mange som ville vera med. Ikkje lett å sjå kven dei var alle, i ei nesten mørk kyrkje. Men inn frå «våpenhuset» kom det ein prosesjon med levande ljos. Først kom dei nye konfirmantane, deretter kom speidarane i lange rekkjer. Alle hadde ljos og fordelte seg i kyrkja. 

Ungdomane deltok i lesing av tekstar og bøner, tenning av lys og ved å bera lys i rommet. Prest i gudstenesta var Sigfred Sørensen som med sin milde og lune måte å snakka på knytta bibelbodskap og tale til dei sju lysa i den sjuarma lysestaken. Eitt etter eitt vart dei sløkte, etter kvart som konfirmantane han refererte til i tidlegare samanhengar viste til at det ikkje berre var kjærleik og omsorg i verda. Til slutt stod berre eitt igjen: Håpet (vona). Om alt anna er borte står vi att med håpet som Jesus har tent i oss. Og det skal få tenna dei andre lysa.

Trusopplærar og kyrkjelydspedagog Esther L Åsheim presenterte dei ni konfirmantane (der sju var til stades) som nå tek til med opplæring og førebuingstida fram mot konfirmasjonen som blir i slutten av august komande år. 

God salmesong og musikk fekk fylla kyrkja. La oss vandra i lyset, og nordnorsk julesalme. Så kunne vi alle vandra ut i den mørke kvelden og treffa sambygdingane til ein prat på kyrkjebakken, før ein etter ein reiste heim til sitt, med gode minne frå ei lysmesse i førjulstida.