|
Meir her meir om
Stien går frå Øvre Vik og opp Skiftesdalen
Roald Årvik fortel:
Stien går frå Øvre Vik og opp Skiftesdalen, i gjennom nordre Svortufskar.
På toppen av skaret er det merka rute til toppen av Svortufs, der det
ligg ei bok til å skriva seg inn i. På toppen er det med Johan Owe si
velsigning rydda ein del tre, slik at ein nå har ei flott synsrand frå
Kvame i nord til Dommersnes i sør. Vidare går turen på nordaustsida av
Svartufstjørn fram til Longavatnet, like før Svortufstjørn kan ein ta
ein avstikkar ned til det søndre skaret som endar ved eit flott
utsiktspunkt.
Dette er ein gammal fjellsti som var nytta før i tida, i alle fall den
delen som går frå Vik og til toppen av det nordre skaret ved Svortufs.
Den originale stien starta ved Løkkja like nord for Klokkargarden og
gjekk nokså beint austover mot Sønjarhuset, men den nyopna stien føl òg
eit gammalt trakk.
 Den
gamle løypestrengen
Den nyopna stien og den gamle stien frå Løkkja smeltar saman like før
Sønjarhuset, som er staden der ein kan sjå to store fester etter det som
ein gong var ein løypestreng. Stien er lagt rett forbi desse festene.
Vidare så går stien opp Skiftesdalen, som er skifta mellom gardane Vik
og Børkjeland. Begge gardane henta ved oppe i Skiftesdalen og for å
letta arbeidet så sette dei opp ein løypestreng for å få veden lettare
ned til bygds.
Løypestrengen hadde 2 strenger, og ein kunne ha korger som gjekk på
trinser hengjande under strengen, slik at når ei korg gjekk ned, så
hadde ein laga ein patent slik at ei anna korg gjekk opp strengen i
fjellsida.
Under 2. verdskrigen dreiv brørne Nils og Johannes Owe og spadde torv or
myra ved det søndre skaret til Svortufs. Torva vart nytta til brensel,
då utmarka på den tida ikkje var attgrodd med tre, slik som i våre
dagar. Dei gjekk opp om morgonen og kom ned om kvelden og nytta dei
omtalte korgene til å få torva ned på løypestrengen. Høgdepunktet på
dagen var når kona til Johannes sendte opp varm middag med
løypestrengen, slik at dei fekk ein rast og energi til å spa meir torv.
Tek ein avstikkaren ned til det søndre skaret så vil ein finna ein
løypestreng som heng oppe, dette er truleg ein tilførselsstreng til den
store løypestrengen ned til bygda. Her vil ein også sjå ei blokk/trinse
som heng att på strengen, samt det som kanskje er festen til den store
løypestrengen. Deler av dette var dekka av mose, men det er no grove
fram i dagen igjen. På veg ned mot strengen så vil ein gå langs ei lita
myr, her vil ein sjå kor det er spadd torv or myra. Noko å reflektera
over i desse varmepumpetider.
For meir detaljer og kart over stien sjå: www.ut.no
Vil ein læra meir om torvskjering sjå også: NrK - distriktsnyheter 17.06.2014
|
2016
