Engasjerte deltakarar på Grendautvalets årsmøte

Styret hadde førebudd seg på stort frammøte, men mange stolar stod tomme då Grendautvalet i Vikebygd inviterte til årsmøte torsdag 13. mars 2025 og 25-30 vikebuar fann vegen til bygdahuset. Gunn Vikingstad, føreslo at møtet skulle leiast av Ståle Jordal og han styrte diskusjonar og røystingar godt gjennom det to timars lange møtet der mesteparten av tida gjekk til å drøfte utbygginga på Dommersnes og utvalet sitt høyringsinnspel. 

I panelet sat Gunnar Birkeland (styremedl.), Gunn Vikingstad (leiar og protokollsekretær), Espen Årvik (styremedl.) og møteleiar Ståle Jordal.

Kor er ungdommen?

– Kor er ungdommen i kveld, spurte Gunnar Birkeland og peika på at gjennomsnittet av dei som møtte var godt vaksne. Men det kom fram argument både for og imot det store området på over 500 mål som inngår i reguleringsplanen dersom alle dei tre utbyggingstrinna vert gjennomførte. Likevel var nok dei fleste samde om at trinn 1, som er området vest for hovudvegen med fordel kunne vore plannert og tilrettelagt for større eller mindre industrietableringar. Størst motstand er det mot ei full utbygging, sjølv om det i møtet også var fleire som meiner ei større utbygging kan auka sannsynet for etablering av verksemder med faste arbeidsplasser og busetnad. Ei storskala utbygging gjer mange urolige for konsekvensar det kan ha for støy, støv og øydelegging av den vakre naturen i Vikebygd.

Kva får Vikebygd igjen for ei utbygging?

Dette spørsmålet er av fleire reist til ordførar og politikarar. Det vart peika på at vi må ha to tankar i hovudet. Om ein er for eller imot, så bør ein også sjå for seg at det kan bli gjennomført ei utbygging, og fokuset bør rettast mot: Kva får Vikebygd igjen for det? Føresetnadar knytt til dette må inn allereie nå i planane. 

Grendautvalet oppfordrar alle som har meiningar til å senda inn høyringsinnspel til kommunen innan fristen. Gunn Vikingstad retta fokuset mot at alle som kjem til bygda, om dei er fastbuande, hyttefolk eller på besøk (t.d. i bubilar, på tur eller besøk) er viktige for bygda og tilfører verdi og aktivitet. – Grendautvalet skal spegla bygda, sa Gunn Vikingstad. – Det vert ikkje røysting over eit framlegg i årsmøtet, men eg har notert mykje og så skal styret laga eit høyringssvar basert på desse innspela, sa ho.

Val av styre i Grendautvalet

Valnemnda hadde gjort ein svært god jobb og la fram eit samla framlegg til alle posisjonar. Desse vart samrøystes valde, også til vegnemnda som fekk skryt for godt arbeid opp mot vegvesen, fylkeskommune og kommune for å utbetra vegen. Frantz Lea orienterte om utbyggingsplanar som er for Vikevegen 2025-2028. Det er von om at mykje skal skje og Frantz er som alltid positiv og optimistisk. Flott at desse vart attvalde.  

Gunn Vikingstad med fleire peika på at auken i trafikken med omlag 35 lastebilar + pendlarar under utbygginga, vil vera utfordrande for vegen vi har i dag. Her treng vi større utvidingar og gul midtstripe (noko som tilseier eit minimum på 6,5 meter breidd + vegskulder og grøfter) for å sikra ein trygg og sikker veg. Når vi veit at underlaget på vegen er frå den tida då dei brukte hest og kjerre, så betyr dette i praksis heilt ny veg frå Vikebygd (Nordabygda?) til Trovåg. 

Snakk positivt om Vikebygd – så kjem folk

Viktigast for å få både nye fastbuande, bedrifter med arbeidsplasser, hyttefolk og gjester til bygda, er at vi alle snakkar positivt om Vikebygd med alt denne bygda har å by på. Fleire tok opp dette temaet og oppfordra til at vi får dette fram i media. Grendautvalet fekk oppfordringa om å drøfta korleis dette kan gjerast. -og Frantz Lea fekk spørsmålet: – Kva tid kjem Gondolbanen? Ja, vi må våga å ha visjonar og idear som skaper oppmerksomhet og interesse for Vikebygd rundt om på Haugalandet.  

Årsmøtesakene

Dei formelle årsmøtesakene vart fort unnagjort. Ei god årsmelding fortalde om eit aktivt grendautval. Rekneskapen viser kva grendautvalet har disponert av midlar som kjem ulike lag og tiltak tilgode. Ved årsskiftet er det 189.354 kr på kontoen, og det kjem årleg tilskott frå «SØK» som kan søkjast om tilskott.

Her kan du kan lesa saksliste, årsmelding, rekneskap og kven som fekk tilskott.