Song og musikk i kyrkja

Dei som har motteke kyrkjebladet Hyrdingen kan der lesa om ulike arrangement i sommar og haust i Vikebygd. (Les gjerne kyrkjebladet her). Nedanfor er teksten som Ingrid Mathilde Sørvåg skreiv om

Musikk i Vikebygd

Fyrste helga i juli var det travelt i Vikebygd. Helga starta med bygdevandring om laurdagen. Dei som var med, fekk høyre forteljinga om dei ulike kyrkjene i Vikebygd; frå stavkyrkja som var den fyrste og fram til den vakre kyrkja me har i dag.

To av kyrkjene i Vikebygd har brunne, og forteljinga om desse to er kanskje den mest spennande delen? Me som er i kyrkja, bør også brenne. Me bør brenne for noko, noko som er større enn oss sjølv.

Sundag 3.juli starta med ei gudsteneste med arbeidstittelen «song- og musikkgudsteneste». Ingrid Tveit, Lina Fisk Eide, Tom Roger Aadland og Arne Tveit deltok med song og musikk i tillegg til presten, Sigfred Sørensen. Alle me som var i kyrkja, deltok i god song.

Etter gudstenesta var det tid for kyrkjekaffi og ein pause før neste post på programmet som var konsert i kyrkja. Her deltok Lina Fisk Eide, Cathrine Nordseth, Ingrid Tveit og Tom Roger Aadland, med andre ord: svensken, dansken og norsken. Inntektene frå konserten er eit godt bidrag til det me treng for å kunne supplere lydutstyret som er i bruk i kyrkja.

Seinare i juli hadde me open kyrkje to gonger, då spelte Caroline Bjørnevik på orgelet og dei som ville kunne komme inn for å lytte eller meditere.

Lina Fisk Eide og Cathrine Nordseth var mellom dei som gleda oss med vakker song denne søndagen.