Fantastisk helg og rikelig med snø i fjellet

Sol frå blå himmel låg over Vikebygd og  fjellet var dekka av snø. Mange nytta helga til å gå tur på ski eller til fots. Men det var ikkje trong for å reisa langt. Løypene frå Eikås og frå Vikebygd opp til Vikestølen vart nytta av fleire vikebuar denne helga.

Natt til søndag fall temperaturen til under 10 kuldegrader i bygda. Men utover morgonen steig den sakte til plussgrader i sola.  På Eikås kunne ein ta på seg skia alt på parkeringsplassen og gå på fast snø innover skogsvegen. Litt hardt var det då det har vore både mildvær og frost i seinare tid, men godt føre for ein fin søndagstur.

Oppe på Vikestølen vart snøen målt til over 90 cm på flatmark.  -Det er ein auke på fleire cm dei siste to vekene, kunne Gunnar Birkeland konstatere etter at han hadde nytta tommestokken til å sjekka snødjupna.  

Det er varsla vêromslag nå. Over helga kan ein få høgare temperatur og kanskje regn. Men det er grunn til å ru at det oppe i fjellet kan vera snø som kjem ned og sikrar skiføre også i påskeveka.

Vikefjella er gjort godt tilgjengelege med mange godt oppmerka løyper, noko vi kan takka Roald Årvik for. I fleire år har han tråla fjella og både rydda og merka dei gamle stiane, men også laga nye for at folk i bygdane her skal kunna koma seg ut i friluft og opp i fjella. Hans siste prosjekt er ein ny tursti opp til Våbrekkefjell. 

Dt gode utvalet av turløyper kan du sjå på vikebygd.no der det er link til kart og orientering om kor løypene går.