Spesielt tenkjer eg på

• Takk til dei som heiste og firte flagget på Trodlanibba!
• Det flotte korpset vårt.  Kva er vel 17. mai utan korpsmusikk? Dei var med heile dagen. I parken, i kyrkja, ved kransenedlegging, i toget, ved aldersbustadane og bygdahuset. På scenen under festen. Tusen takk til alle gamle korpsmedlemmer som stiller opp ekstra. Fire trommeslagarar sørgja for både takt og 17-mai stemning i tillegg til all hornmusikken.
• Takk til flaggberarar. Både store og små. 
• Takk til speidarane som stod for seremoni med flaggheising i parken, flaggborg i kyrkje og ved kransenedlegging.
• Takk til 7.-klassingane for ein kjempegod tale og kransenedlegging ved kyrkja.
• Takk til Eldbjørg Andreassen for ei flott gudsteneste
• Takk til dei som laga mat, stod for leiker og konkurransar, arrangerte festen på dagen
• Takk til den gode talaren på folkefesten, Gunnar Listog
• Takk til alle som deltok med mange ulike oppgåver og dei som ikkje alt er nemnde
• Takk for flott vêr

Speidarane heiste flagget i parken klokka 9:45

Korpset deltok under gudstenesta som bunadskledde Eldbjørg Andreassen leia. Musikk til salmesong og nasjonalsong var det bygda sin eigen organist, Arne Tveit, som sytte for.

Prostiprest Eldbjørg Andreassen hadde fått dispensasjon frå prosten til å nytta bunad i staden for prestekjolen i denne gudstenesta. Speidarane bytte på å stå med flagga. Medliturg var Brit Nelly Ness Tveit.

Caroline (la ned kransen), Asgeir (flagg) Alida og Undine (talarar) og Tonje (flagg).

Folketoget starta ved kyrkja og gjekk til Bygdahuset. Flaggborg og barnehage først med eit godt korps etter seg før skulen og alle andre. 

Toget gjekk turen forbi aldersbustadane og til bygdahuset.  Der var det tid for lapskaus, kjempegode kaker, leiker, konkurransar og fest med tale for dagen. Gunnar Listog fekk mykje skryt for denne talen.  Og for dei som ikkje har følgd med i kvardagen, så var ei nyhetsoppdatering med Solveig Hortman og Gunn Vikingstad på sin plass, før premiar for alle konkurransane og ei avslutning med allsong og korpsmusikk.

Ein festdag for born og vaksne, der vi ikkje såg korkje bevæpna politi eller millitære paradar.  Det nærmaste ein kom slikt var vel fredeleg blinkskyting på loftet.
 

Så vent det er vel ingen stad som her i bygda vår
og hugen vert så lett og glad når me på fjellet står.
Og ser dei gilde heimar her som lunt er kransa inn
av lønn og hegg og bjørketrær, ja gran og furu fin.

Og folket dyrkar jorda trutt, dei byggjer, plantar, sår.
Og sikkert vert her mykje rudt for kvart eit år som går.
Og alle gled seg når her er litt framgang i vår bygd -
Og kjenner at me har så kjær vår heimstad: Vikebygd.

Og alle dei som reiste ut dei lengtar ofte heim
til fjell og li og høgste nut, ja til kvar stubb og stein.
Så jamt i tankar bygda stig framfor det indre syn
når ho i soleglad her ligg i glans frå bryn til bryn.

Gud signe då vår fagre bygd sign folket som her bur
og lever her så godt og trygt hjelp at dei på deg trur
Sign alle dei som ute er og lengta mot sin heim
ver med din sterke arm dei nær Gud vara alle dei.

I kvardag, helg; i glede, sorg, det er så godt å gå
til Gud som er vår faste borg og som oss verja må.
Når kyrkja med sin klokkeljom oss kallar mildt derinn.
Ut over bygda tonar: Kom! Då vegen dit me finn.