- Eg er veldig fornøyd med at nesten 10% av folket i bygda kom på frukost, fortel Rolf Alne som kunne telje opp over 40 frukostgjester på laurdagen.  Drøsestova vart for lita så han måtte setja bord og benker også ute på lageret. Og folket såg ut til å kosa seg.  Borna fekk oransje ballongar og dei vaksne vart sitjande og prata saman utover før dei tok turen med handlekorga og laurdagshandelen.

Fullt på Drøsestova, men Rolf Alne serverte frukost også på lageret.  Her sat m.a. Berit Ryvik Skartland, saman med Karl Inge og Renate Vasshus og fleire andre.

235 nærbutikkar som inngår i Merkur ordninga deltok i den nasjonale «Handle lokalt»-kampanjen laurdag 1.november. Dette er ny deltakarrekord. Kampanjen fokuserer på kor viktig den lokale butikken er både som møteplass, servicesenter og salsstad for daglegvarer. Målet er å redusere handelslekkasje og stimulere til meir lokal handel.

Ein flott auke i omsetninga
Rolf Alne slår opp på datamaskina si og viser statistikken over kundane.
-Ein vanleg dag er det 115-130 kundar innom, men om sommaren er det 250-300 som handlar kvar laurdag, fortel Rolf og viser at kundetalet har vore heilt oppe i 377 på ein dag.  Dei 10 første månadane dette året har han hatt ein omsetnad på 8 millionar og har hatt heile 35.000 sal eller innbetalingar i kassen.  Dette er han godt nøgd med og kan visa til ein god auke. 

-Eg ligg 5,57% over budsjett, smiler han. Det er ein auke på 6,45% frå i fjor.  I gjennomsnitt er eit kjøp på 230 kroner.  Det meste går til Vikebuar og hyttefolk i bygda, omlag 9,5 millionar i år, meiner han.  Men det er også ein del matlevering til bedrifter på Bjoa, noko han anslår til omlag 1/2 million.  Ikkje så mykje til private kundar på Bjoa, men han har tre som han kjører varene heim til, der.
- Og så er 10,5 % av varene tilbodsvarer, legg Rolf til. Det er meir enn dei andre Joker butikkane har.

Fleire tenester trekkjer folk til butikken
Frukosten var gratis for kundane, men Rolf peikar på at det er viktig at butikken også kan vera ein sosial arena.  Derfor har han også etablert Drøsestova der det er gratis kaffi. Frå oktober av har folk i Vikebygd både kunna henta og senda postpakkar på butikken. 

"Bok i Butikk," er eit samarbeid med biblioteket om utlån og retur av bøker. Eit anna eksempel på tenester bygdefolket kan nytta seg av.
- Dei som kjem innom, enten for å henta ein pakke eller for å få ein drøs over ein kopp kaffi, handlar også samstundes, fortel Rolf. 

Støtte frå Merkur
Merkur-ordninga er eit statleg støtteprogram for nærbutikkar med omsetnad på inntil 10 millionar kroner i året.  Her kan dei søkja om inntil 50% støtte til investeringar og forbetringar i butikken.  - Eg har fått tilskott på 160.000 kroner i år, seier Rolf.  Desse har han nytta til investering i nye kjølediskar og reolar.  Dei nye kjølediskane brukar mindre straum og er meir miljøvennlege. 

Mini konsert med Tom Roger med fleire
Rolf kunne også overraska kundane med  ein Minikonsert på Drøsestova då klokka vart 12 på laurdagen.

- Tom Roger Aadland kjem innom og tilbaud seg å syngja eit par songar, kunne Rolf fortelja til frukostgjestene som benka seg i butikken laurdag føremiddag.  Han spurte også Lene Bjerga om ikkje ho kunne ta med gitaren.  Det gjorde ho og song og spela både sjølv og saman med dottera, Linnea, før Tom-Roger slapp til med ein song frå den nye plata hans og ein frå tidlegare album.

På bilde:
Linnea syng og Lene Bjerga spelar til

Vikebygd Landhandel har ope laurdag klokka 08:00 - 16:00,
og vanlege dagar frå klokka 08:00 - 18:00.

Ein film om Handle lokalt-dagen på Joker 01.11.2014:  Snurr film

Vikebygd Landhandel - Joker -  inviterer til
frukost på butikken 1.11.

235 nærbutikkar vil delta i den nasjonale «Handle lokalt»-kampanjen laurdag 1.november. Dette er ny deltakar-rekord. Kampanjen fokuserer på kor viktig den lokale butikken er både som møteplass, servicesenter og salsstad for daglegvarer. Målet er å redusere handels-lekkasje og stimulere til meir lokal handel.

- Eg inviterer alle i bygda til å ta frukosten på butikken på laurdag, fortel Rolf Alne.
 
 - Eg spanderer og det blir mellom klokka 9 og 11.  I tillegg til frukost så blir det  overraskingar og gode tilbod. Og så kan jo folk ta laurdagshandelen med det same.

Ope laurdag klokka 08:00 - 16:00

Ein film om
Handle lokalt-dagen på Joker 01.11.14:
Snurr film

Tilbake til hovudsida

Link til FOTOALBUM for Vikebygd

Fleire reportasjar frå Vikebygd 2014 ser du her.